مەزڵووم عەبدی: چاوەڕوان دەکرێت دانوستانی لایەنە کوردییەکان دەستپێبکاتەوە

ئاڤا نیوز

 

فەرماندەی گشتیی هێزەکانی سووریای دیموکرات (هەسەدە) ڕایدەگەیێنت، هەوڵی نوێ هەیە بۆ دەستپێکردنەوەى ئەو گفتوگۆیانە لەنێوان لایەنەکانى ڕۆژئاوای کوردستان و چاوەڕوان دەکرێت مانگی داھاتوو لەسەر داوای هاوپەیمانان دەستپێبکاتەوە.

 

وێنە گەورەکە: بەهۆی سووتاندنی بارەگاکانی ئەنجوومەنی نیشتمانیی کورد (ئەنەکەسە) لەلایەن پارتی یەکێتیی دیموکرات (پەیەدە)ـەوە و دەستگیرکردنی ئەندامەکانیان، تاوەکو دێت ئاڵۆزییەکانی نێوان ئەو دوو هێزەی ڕۆژئاوای کوردستان زیاتر دەبێت.

 

لێدوانی فەرمی: مەزڵووم عەبدی، فەرماندەی گشتیی هەسەدە لە ڕاگەیێنراوێکدا دەڵێت، ئەمریکا، بەریتانیا و فەرەنسا داوای دەستپێکردنەوەی گفتوگۆکانى نێوان لایەنە کوردییەکانی ڕۆژئاوای کوردستانیان کردووە و ئێمەش پێشوازی لەو داواکارییە دەکەین و بە گرنگی دەزانین.

 

لەلایەکی دیکەوە: پێشتر ئیبراهیم برۆ، ئەندامی کۆمیتەی پەیوەندیی دەرەوەی ئەنەکەسە بە ئاڤا نیوزی گوتبوو: "ئەمریکا خواستی لێکنزیکبوونەوەی لایەنە کوردییەکانی هەیە، پێداگری لەسەر کۆتاییهاتنی کێشەکان دەکات، بەڵام زەمینەی دانیشتن نالەبارە و پەیەدە ڕێگرە لە لەیەکنزیکبوونەوە".