پاڵپشتیی دارایی بۆ ڕزگاربووانی ئێزدی دەچێتە واری جێبەجێکردنەوە

ئاڤا نیوز 

 

سەرۆکی بنکەی لالش ڕایگەیاند، ڕێکارەکانی پڕۆژەی پاڵپشتیی دارایی سەرۆکوەزیران بارزانی بۆ ڕزگاربووانی دەستی داعش لە تەواوبووندایە، لەم هەفتەیەدا جێبەجێ دەکرێت.

 

وێنە گەورەکە: ڕۆژی 02-07-2024، لە هەولێر سەرۆکوەزیران بارزانی پڕۆژەیەکی پاڵپشتیی دارایی بۆ ڕزگاربووانی دەستی داعش ڕاگەیاند کە مانگانە زیاتر لە سێ هەزار ژن و کچی ڕزگاربووی ئێزدی لێی سوودمەند دەبن و 150 هەزار دینار وەردەگرن.

 

بۆچی گرنگە: ئەو پڕۆژەیەی سەرۆکوەزیران بارزانی هاوکارییەکی گرنگە، چونکە ھێشتا بەشێکی زۆری کوردانی ئێزدی لە کەمپەکاندا دەژین و پێویستیان بەوە ھاوکاری هەیە.

 

لێدوانی فەرمی: سەعید جردۆ، سەرۆکی بنکەی لالشی ڕۆشنبیری و کۆمەڵایەتی بە ئاڤا نیوزی گوت: لەم هەفتەیەدا پڕۆژەی هاوکاری دارایی سەرۆکوەزیران بارزانی بۆ ڕزگاربووانی دەستی داعش دەکەوێتە واری جێبەجێ کردنەوە و مانگانە بڕێک پارە بە ڕزگاربووان دەدرێت.

 

زانیاریی زیاتر: پرۆژەکە لەڕێگەی بنکەی لالش و لق و نووسینگەکانیەوە سەرپەرشتی دەکرێت و زیاتر لە سێ هەزار ئێزدی لێی سوودمەند دەبن.