ڕەیان کلدانی و قەیس خەزعەلی خۆیان بە براوەی کەرکووک دەزانن

ئاڤا نیوز 

ڕەیان کلدانی و قەیس خەزعەلی کە دوو  فەرماندەی حەشدی شەعبین و لە لیستی تیرۆر و سزادراوەکانی ئەمریکان، لە پرۆسەی دابەشکردنی پۆستەکانی کەرکووک لەپاڵ بافڵ تاڵەبانی خۆیان بە براوەی کەرکووک دەزانن.

وێنە گەورەکە: ڕێکخستنی کۆبوونەوەی ئەنجوومەنی پارێزگای کەرکووک و دابەشکردنی پۆستەکان لەلایەن  یەکێتیی نیشتمانیی کوردستان و چەند لایەنێکی دیکە، بێ بەشداری سەرجەم پێکهاتە  و لایەنەکان ناڕەزایەتی و کاردانەوەی لێکەوتووەتەوە و پرۆسەکە "بە خیانەت و فێڵکردن دادەنێن".

چیرۆکی سەرەکی: قەیس خەزعەلی، ئەمینداری گشتیی عەسائیبی ئەھلی حەق لە تۆڕەکۆمەڵایەتییەکان وێنەیەکی خۆی لەگەڵ هەریەک لە بافڵ تاڵەبانی، سەرۆکی یەکێتی و ڕەیان کلدانی، سەرۆکی هاوپەیمانیی بابلیۆن بڵاوکردووەتەوە، وەکو ئاماژەیەک بۆ سەرکەوتن بەسەر ڕکابەرەکانیان و پەراوێزخستنیان.

لێدوانی فەرمی: ئەمڕۆ دووشەممە بەرەی تورکمانی بەفەرمی لە دادگای فیدراڵی سکاڵای لەسەر ڕێکخستنی کۆبوونەوە و بڕیارەکانی ئەنجوومەنی پارێزگای کەرکووک تۆمارکرد. ئەندامی مەکتەبی سیاسیی بەرەکە بە ئاڤا نیوزی گوت: "ئەمەی کراوە نایاساییە و کاریگەریی خراپ لەسەر دۆخی کەرکووک دروست دەکات".

 

ئەوەی پێویستە بیزانیت: ڕەیان کلدانی بەهۆی پێشێلکردنی مافەکانی مرۆڤ و  تێوەگلان  لە گەندەڵی لە ساڵی 2019 ەوە لە لیستی سزادراوانی ئەمریکایە. هاوکات  قەیس خەزعەلی، سەرۆکی عەسائیبی ئەهلی هەق لە ساڵی 2020 ەوە  بەتۆمەتی "ئەنجامدانی تیرۆر و تووندوتیژی و کارکردن بۆ ئێران" خراوەتە لیستی تیرۆری ئەمریکا.