عێراق 65%ی بەهەدەردانی غاز کۆنترۆڵ دەکات

ئاڤا نیوز

وەزارەتی نەوتی عێراق ئاشکرای دەکات، لەڕێگەی ژمارەیەک گرێبەستەوە 65%ی بەهەدەردانی ئەو غازەیان چارەسەرکردووە کە لەکاتی بەرهەمهێنانی نەوتدا دەسووتێت.

بۆچی گرنگە: لەلایەک ئەو پارەیە دەگەڕێنێتەوە بۆ خەزێنەی عێراق کە لە کڕینی غازی دەرەکیدا خەرج دەکرێت، لەلایەکی دیکەشەوە کاریگەریی ئەرێنی لەسەر پاراستن و پاکبوونەوەی ژینگەی وڵات دەبێت.

لێدوانی فەرمی: حەیان عەبدولغەنی، وەزیری نەوتی عێراق لە لێدوانێکدا ڕایگەیاند، ئێستا لە  ژمارەیەکی بەرچاوی کێڵگەکاندا دەست بە وەبەرهێنانی غاز کراوە، وەزارەتەکەیشی توانیویەتی 65%ی بەهەدەردانی ‌غاز کۆنترۆڵ بکات، بڕیاریشە تا سەرەتای ساڵی 2028 هیچ بڕێکی غاز نەسووتێت و هەمووی لە بەرهەمهێنانی کارەبادا بەکاربهێنرێتەوە.

لەلایەکی دیکەوە: بەگوێرەی ڕێککەوتنی نێوان کۆمپانیای تۆتاڵی فەرەنسی و حکومەتی عێراق، تا ساڵی 2026  کۆمپانیاکە لە کەرتی غازدا وەبەرهێنانی گەورە دەکات و 65%ی پێداویستی عێراق بۆ غاز پڕدەکاتەوە.