یەکەم قۆناغی سەرژمێریی دانیشتووان دەستپێدەکات

ئاڤا نیوز

 

سەرەتای مانگی داهاتوو پرۆسەی ژمارەدانان لەسەر ماڵ و باڵەخانەکان دەستپێدەکات، ئەوەش بە یەکەمین قۆناغی جێبەجێکاری سەرژمێریی دانیشتووان لە عێراق و کوردستان دادەنرێت.

 

وێنە گەورەکە: بڕیارە 20ـی تشرینی دووەمی ئەمساڵ لە عێراق و هەرێمی کوردستان سەرژمێریی گشتی دانیشتووان بکرێت، بۆ ئەو مەبەستەش حکومەتی فیدراڵ لە ئامادەکارییەکانی بۆ ئەو پرۆسەیە بەردەوامە.

 

لێدوانی فەرمی: عەبدولزەهرە هینداوی، گوتەبێژی وەزارەتی پلاندانانی عێراق بە ئاڤا نیوزی گوت، لە سەرەتای مانگی داهاتووەوە پرۆسەی ژمارەدانان لەسەر ماڵ و باڵەخانەکان دەستپێدەکات، لە هەمان کاتیشدا پرۆسەی دیاریکردنی سنووری جوگرافی هەر ناوچەیەکی دانیشتووان و تۆمارکردنی تۆماری خێزانەکانیش بەڕێوەدەچێت، ئەو سێ پرۆسەیەش زیاتر لە شەش هەفتە دەخایەنێت.

 

زانیاریی زیاتر: بەگوتەی گوتەبێژی وەزارەتی پلاندانان، بە تەواوبوونی پرۆسەی ژمارەدانان لەسەر ماڵ و باڵەخانەکان، ئامادەکارییەکان بۆ جێبەجێکردنی سەرژمێریی دانیشتووان لە 20ـی تشرینی دووەمی ئەمساڵدا کۆتاییان دێت.