قوباد تاڵەبانی: ئەوانەی لە سەیدسادق كوژران دوو ڕۆژنامەنووسی ژن بوون

ئاڤا نیوز

قوباد تاڵەبانی، جێگری سەرۆکوەزیرانی هەرێمی کوردستان ڕایدەگەیێنێت، "قوربانییەکانی هێرشە درۆنییەکەی نزیک سەیدسادق دوو ڕۆژنامەوانی ژن بوون نەک ئەندامی هێزێکی چەکدار".

وێنە گەورەکە: ئەمڕۆ لەنزیک سەیدسادق درۆن ئۆتۆمبێلێکی کردە ئامانج و بەهۆیەوە دوو کەس کوژران و کەسێکیش برینداربوون، میدیای پەکەکە ڕایگەیاند ڕۆژنامەنووسی کەناڵێکی نزیک ئەوان بوون، دژەتیرۆری کوردستانیش ڕایگەیاند بەرپرسێکی پەکەکە لەنێو ئۆتۆمبێلەکە بووە.

لێدوانی فەرمی: قوباد تاڵەبانی، جێگری سەرۆکوەزیرانی هەرێمی کوردستان ڕایگەیاند:" قوربانییەکانی هێرشە درۆنییەکەی نزیک قەزای سەیدسادق، دوو رۆژنامەوانی ژن بوون، نەک ئەندامی هێزێکی چەکدار تا مەترسی بن بۆ سەر ئاسایش و سەقامگیری هیچ وڵات و ناوچەیەک". 

زانیاریی زیاتر:"کوشتنی ئەم دوو ڕۆژنامەوانە تاوانێکی پاساوهەڵنەگرە و دژی هەموو جۆرە یاسا و نەریتێکی نێودەوڵەتییە و بە توندی ئیدانەی دەکەین، جگە لەوەش پێشێلکردنێکی زەقی سەروەری خاکی عێراقە".

قووڵتر: قوباد تاڵەبانی دەڵێت "جارێکیتر داوا لە حکومەتی فیدراڵ و کۆمەڵگای نێودەوڵەتی دەکەین سنوورێک بۆ ئەم پێشێلکارییانە دابنێن کە بوونەتە هەڕەشەیەکی جددی بۆ سەر ژیانی هاوڵاتیانی مەدەنی لە هەرێمی کوردستان".