وەزارەتی پەروەردە یەکەم هەنگاو بۆ بە گرێبەستکردنی وانەبێژان دەستپێدەکات

ئاڤا نیوز 

 

دوای بڕیارەکەی سەرۆکوەزیران بارزانی بۆ بە گرێبەستکردنی مامۆستایانی وانەبێژ، حکومەتی هەرێمی کوردستان داوای وردبینی ناوی وانەبێژان لە بەڕێوەبەرایەتییە گشتییەکانی پەروەردە دەکات.

 

وێنە گەورەکە: دوای بڕیاری بە گرێبەستکردنی 38 هەزار مامۆستای وانەبێژ، وەزارەتی پەروەردە نووسراوێک ئاراستەی بەڕێوەبەرایەتییە گشتییەکانی پەروەردەی (هەولێر، سلێمانی، دهۆک، گەرمیان، زاخۆ، سۆران، خوێندنی کوردی لە کەرکووک) دەکات.

 

ڕاگەیێنراوی فەرمی: نووسراوەکە واژۆی ئالان حەمەسەعید، وەزیری پەروەردەی لەسەرە و داوا لە بەڕێوەبەرایەتییەکان دەڵێت، لیستی ناوی مامۆستایانی وانەبێژی دانەمەزراوتان بۆ دەنێرین، وردبینی لە ناوەکان بکەن و هیچ کەموکوڕیەک نەبێت.

 

زانیاریی زیاتر: وەزارەتەکە تەنیا حەوت ڕۆژی داناوە بۆ ئەوەی لیستەکان بۆ بەڕێوەبەرایەتیی گشتیی دیوانی وەزارەت بگەڕێننەوە و ڕۆژی 05-09-2024، وەک دوایین وادە بۆ گەڕاندنەوەی لیستەکان دیارکردووە.

 

ئەوەی پێویستە بیزانیت: دوێنێ سەرۆکوەزیران بارزانی بەئامادەبوونی وەزیری پەروەردە لەگەڵ نوێنەرانی مامۆستایانی وانەبێژان کۆبووەوە و بڕیاری دا سەرجەم مامۆستایانی وانەبێژ بکرێنە گريبەست، کە ژمارەیان نزیکەی 38 هەزار کەسە.