لە وەزارەتێکی عێراق 66 هەزار فەرمانبەر بێکارن

ئاڤا نیوز

 

پەرلەمانتارێکی عێراق ڕایدەگەیێنێ، بێکاریی شاراوە لە حکومەتی عێراق قەیرانێکی گەورەیە، وەزارەتی پیشەسازی و کانزاکان بەنموونە دەهێنێتەوە و ئاشكرای دەکات، لەکۆی 106 هەزار فەرمانبەری وەزارەتەکە، تەنیا 40 هەزاریان چالاکن و ئەوانی دیکە بێکارن.

 

لێدوانی فەرمی: مۆفەق حوسێن، ئەندامی لیژنەی ئابووریی پەرلەمانی عیراق بە میدیاکانی ڕاگەیاندووە، "پێکهاتەی وەزارەتی پیشەسازی و کانزاکان کۆنە، تاقیگە و کارگەکانی ناو وەزارەت زۆر کۆنن و تەمەنی دامەزراندنیان بۆ ساڵانی هەشتاکانی سەدەی ڕابردوو دەگەڕێتەوە، هەربۆیە ناتوانێت ڕکابەری بەرهەمە هاوردەکراوەکان بکات".

زانیاریی زیاتر: بەگوتەی مۆفەق حوسێن، پێشخستنی دۆخی ئابووری و پیشەسازیی عێراق پێویستی بە بڕیار و ئیرادەیەکی سیاسی ڕاستەقینە هەیە بۆ چارەسەرکردنی کێشەکانی ناو وەزارەتی پیشەسازی لەڕووی داڕشتن و مۆدێرنکردنی تاقیگە و کارگەکانەوە.

زیانە سەرەکییەکان: وەک ئەندامەکەی لیژنەی ئابووری باسی دەکات، "وەزارەتی پیشەسازی خاوەنی 106 هەزار فەرمانبەرە، بەگوتەی وەزیری پیشەسازیش تەنیا 40 هەزار فەرمانبەریان ڕاستەقینەن، 66 هەزار فەرمانبەرەکەی دیکە دەوام ناکەن و بێبەرهەمن، ئەمەش جۆرێکە لە بێکاری شاراوە لە حکومەتدا".