ئاوات شێخ جەناب و تەیف سامی لەبارەی مووچە کۆدەبنەوە

ئاڤا نیوز

دوای زنجیرەیەک کۆبوونەوەی نێوان ئەنجوومەنە ئابوورییەکانی عێراق و کوردستان، ئەمڕۆ دووشەممە ئاوات شێخ جەناب، وەزیری دارایی و ئابووریی هەرێمی کوردستان و تەیف سامی، وەزیری دارایی عێراق کۆدەبنەوە و پرسی مووچە تاوتوێ دەکەن.

وێنە گەورەکە:  بەسەرپەرشتیی سەرۆکوەزیران بارزانی، لە دوێنێنوە هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر زنجیرەیەک کۆبوونەوەیان کردووە، ئێوارەی ئەمڕۆ کۆتایی بە کۆبوونەوەکان دێت و بڕیار لەسەر ڕاسپاردەکانی دوێنێ دەدرێت.

زانیاریی پەیامنێر: کوردستان حەسەن، پەیامنێری دیپلۆماسی ئاڤا گوتی، "بڕیارە ئەمڕۆ ئاوات شێخ جەناب بەسەرۆکایەتیی شاندێکی دارایی، بە جیا لەگەڵ تەیف سامی، وەزیری دارایی عێراق و عەلی عەلاق، پارێزگاری بانکی ناوەندی و شاندی دارایی یاوەریان کۆببێتەوە، گفتوگۆ لەبارەی بودجە و چارەسەری گرفتەکانی پرسی مووچە دەخرێتەڕوو.

زانیاریی زیاتر: بەگوێرەی زانیارییەکانی پەیامنێری ئاڤا، لە کۆبوونەوەکەی ئەمڕۆدا پرسی مووچەی مانگەکانی هەشت تاوەکو 12 یەکلایی دەکرێتەوە.


باکگراوند: دوێنێ یەکشەممە بە ئامادەبوونی سەرۆکوەزیران بارزانی، کۆبوونەوەیەکی سێ کاتژمێری لەنێوان هەردوو ئەنجوومەنی ئابووریی عێراق و هەرێمی کوردستان بەڕێوەچوو، هەردوولا هاوڕابوون لەسەر دۆزینەوەی میکانیزمی هاوبەش بۆ چارەسەرکردنی کێشەکانی مووچە، گومرگ و خاڵە سنوورییەکان.