ئەنجوومەنی وەزیرانی عێراق بڕیار لەبارەی ڕاسپاردەکانی هەرێمی کوردستان دەدات

ئاڤا نیوز 

 

ئەنجوومەنی وەزیرانی عێراق بڕیار لەبارەی ڕاسپاردەکانی کۆبوونەوەی هاوبەشی ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان دەدات.

 

وێنە گەورەکە: ئەنجوومەنی وەزاری بۆ ئابووری ڕاسپاردەیەکی پێشکەش بە ئەنجوومەنی وەزیرانی عێراق کردووە بۆ ئەوەی وەزارەتی دارایی عێراق ئاراستە بکات بۆ چارەسەرکردن و ناردنی مووچە ڕاگیراوەکانی هەرێمی کوردستان، ئەوانەی بە هۆی تەواونەکردنی بایۆمەتری دوورخرابوونەوە.

 

لێدوانی فەرمی: سەرچاوەیەکی باڵا لە حکومەتی عێراق بە ئاڤا نیوزی ڕاگەیاند: یەکێک لە تەوەرەکانی کۆبوونەوەی ئەمڕۆی ئەنجوومەنی وەزیران، گفتوگۆکردن دەبێت لەسەر ڕاسپاردەکانی کۆبوونەوەی هاوبەشی ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان.

 

زانیاریی زیاتر: بە گوتەی ئەو سەرچاوەیە، دوای گفتوگۆکردنی ئەو بابەتە لە کۆبوونەوەکە دەنگی لەسەر دەدرێت.

 

ئەوەی پێویستە بیزانیت: ڕۆژانی یەکشەممە و دووشەممە، بە سەرپەرشتیی سەرۆکوەزیران بارزانی، ژمارەیەک کۆبوونەوە لەنێوان هەردوو ئەنجوومەنی وەزاریی عێراق و هەرێمی کوردستان لە شاری هەولێر بەڕێوەچوو. هەندێک لە بابەتەكان بڕیاری هەنووکەییان لەبارەوە دراوە و ئەوانی دیکەش وەک ڕاسپاردە ئاراستەی ئەنجوومەنی وەزیرانی فیدراڵ کران.