مووچەی ئەمساڵی فەرمانبەران مسۆگەر دەکرێت

ئاڤا نیوز

 

دوای کۆبوونەوەکانی ئەنجوومەنی ئابووریی عێراق و هەرێمی کوردستان لە هەولێر، حکومەتی عێراق بڕیاریداوە مووچەی ئەمساڵی فەرمانبەرانی هەرێمی کوردستان بەبی کێشە بنێرێت. 

 

وێنە گەورەکە: ڕۆژانی یەکشەممە و دووشەممەی ڕابردوو، بە سەرپەرشتیی سەرۆکوەزیران بارزانی، ژمارەیەک کۆبوونەوە لەنێوان هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر بەڕێوەچوو، تیایدا چەند ڕێککەوتنێک کراو و ناوەڕۆکی ڕێککەوتنەکە لە کۆبوونەوەی ئەنجوومەنی وەزیرانی عێراق خراوەتەڕوو. 

 

لێدوانی فەرمی: هێمن میرانی، بەڕێوەبەری دیوانی وەزارەتی ناوخۆ ڕایگەیاند: لە بەرهەمی کۆبوونەوەی هاوبەشی نێوان هەردوو حکومەتی هەرێمی كوردستان و عێراق، ئەنجوومەنی وەزیرانی عێراق بڕیاریدا کە تا کۆتایی ساڵ مووچەی فەرمانبەرانی کوردستان بەردەوام دەبێت.

 

زانیاریی زیاتر: هێمن میرانی ئاماژەی بە ئەوەش دا حکومەتی هەرێمی كوردستان کوردستان تا سەری ساڵ بایۆمەتری و هەژماری من تەواو دەکات.

 

لەلایەکی دیکە:  ئامانج ڕەحیم، سكرتێری ئەنجوومەنی وەزیرانی هەرێمی كوردستان ڕایگەیاند، ئەنجوومەنی وەزیرانی عێراق لە کۆبوونەوەی ئەمڕۆی دەنگی لەسەر پەسەندکردنی ڕاسپاردەی کۆبوونەوەی هاوبەشی ئەنجوومەنی ئابووریی فیدڕاڵ وهەرێمی کوردستان بۆ ناردنی مووچە ڕاگیراوەکانی مانگی دوو تا مانگی هەشت و بەردەوام بوون لە سەر خەرجکردنی تاوەكو كۆتایی ساڵی دارایی 2024 دا.

 

بۆچی گرنگە: دوای بڕیارەکەی حکومەتی عێراق چیتر مووچەی فەرمانبەرانی هەرێمی کوردستان دوا ناکەوێت و لەکاتی خۆیدا دابەش دەکرێت.