سەدا 40ـی فۆڕمی وەرگرتنی زەوی بۆ وەزارەتەکان گەڕێنراونەتەوە

ئاڤا نیوز

 

ڕێکارەکانی ئامادەکردنی زەوی و دابەشکردنیان بەسەر فەرمانبەران  بەردەوامە، هەنگاوەکان تائێستا گەیشتوونەتە قۆناغی گۆڕینی ڕەگەزی زەوی و گواستنەوەی خاوەندارێتی زەوییەکە لە وەزارەتی کشتوکاڵەوە بۆ سەر ڕاژەی وەزارەتی شارەوانی و گەشتوگوزار. 

 

وێنە گەورەکە: هەفتەیەک لەبەردەم فەرمانبەران و خانەنشینان ماوە، بۆ ئەوەی فۆرمەکانیان بگەڕێنەوە وەزارەتەکان، بەمەبەستی سوودمەند بوون لە وەرگرتنی زەوی، ئامانجەکە ئەوەیە تا کۆتایی ئەمساڵ پرۆسەی دابەشکردنی زەوی کۆتایی پێبێت.

 

لێدوانی فەرمی:  سەربەست مەولوود، بەڕێوەبەری گشتیی کاروباری یاسایی لە وەزارەتی شارەوانی و گەشتوگوزار بە ئاڤا نیوزی گوت، "بەشێکی زەوییە کشـتوکاڵییەکان ڕاژەیان خراوەتە سەر وەزارەتی شارەوانی، ئێستاش %15 زەوییەکان ئامادەن بۆ ئەوەی بەسەر فەرمانبەر و خانەنشینان دابەش بکرێن."

 

زانیاریی زیاتر: ڕێکارەکانی گەڕاندنەوەی فۆرم گۆڕانکاری بەسەردا هاتووە، فۆرمی سەرجەم وەزارەتەکان سەرەتا دەگەڕێنرێتەوە وەزارەتی شارەوانی، دوای پێداچوونەوە بە گشتاندنێک بە ئامانجی پەسەندکردن ڕەوانەی ئەنجوومەنی وەزیران دەکرێت، تاوەکو ئێستا %40 فۆرمەکان گەڕێنراونەتەوە.

 

باکگراوند: لە ڕۆژی 07-08-2024 پرۆسەی گەڕانەوەی فۆرمی دابەشکردنی زەوی لە وەزارەت و فەرمانگەکان دەستیپێکردووە و 200 هەزار فەرمانبەر و خانەنشین لە پڕۆسەکە سوودمەند دەبن.