حکومەتی عێراق تیمێکی پزیشکی ڕەوانەی بەیرووت دەکات

ئاڤا نیوز

 

دوای هێرشە ئەلیکترۆنییەکەی لوبنان، حکومەتی عێراق بڕیار دەدات تیمێکی پزیشکی ڕەوانەی بەیرووت بکات، هاوکات داوای دەستوەردانی بەپەلەی نێودەوڵەتی دەکات.

 

چیرۆکی سەرەکی: کاتژمێر 03:30 خولەکی ئەمڕۆ سێشەممە هێرشێکی ئەلیکترۆنی کرایە سەر ئامێرەکانی پەیوەندیکردنی ئەندامانی حیزبوڵڵای لوبنان و لەڕێگەی هاککردنەوە تەقێنرانەوە، تاوەکو ئێستا کوژرانی هەشت کەس و بریندابوونی دوو هەزار و 750 کەس لە لوبنان و برینداربوونی دەیان کەسی دیکە لە سووریا ڕاگەیێنراوە.

 

ڕاگەیێنراوی فەرمی: باسم عەوادی، گوتەبێژی حکومەتی عێراق ڕایگەیاند: ڕووداوەکەی ئەمڕۆی بەیرووت و هێرشە سەربازییە یەک لەدوای یەکەکانی ئیسرائیل بۆ سەر خاکی لوبنان، پێویستی بە چارەسەری بەپەلەی نێودەوڵەتی هەیە، بۆ ئەوەی بازنەی جەنگ بەرەو دۆخێکی فراوان و نەخوازراو نەڕوات.

 

زانیاری زیاتر: بەگوتەی عەوادی، محەممەد شیاع سوودانی، سەرۆکوەزیرانی عێراق ڕێنمایی داوە، بەخێرایی تیمێکی پزیشکی ڕەوانەی بەیرووت بکرێت، بۆ چارەسەرکردنی بریندارانی ڕووداوەکە.