سیروان بارزانی: جموجۆڵی داعش زیاد بووە و مەترسییان دروست کردووە

ئاڤا نیوز

لەو ناوچانەی بۆشایی ئەمنین لەنێوان پیشمەرگە و سوپای عێراق، جموجۆڵی چەکدارانی داعش  زیادی کردووە، بەئاشکرا و بەشێوەی پارتیزانی دەگەڕێن و، مەترسی هێرش و پەلاماردانیان بۆ سەر هێزەکانی پێشمەرگە و سوپای عێراق و خەڵکی مەدەنی دروست کردووە.

 

وێنە گەورەکە: هەرچەندە شکستپێهێنانی داعش لەلایەن عێراقەوە ڕاگەیێنراوە، بەڵام تا دێت جموجۆڵەکانیان زیاتر دەبێت، بەتایبەت لەو ناوچانەی بۆشایی ئەمنین لە نێوان پێشمەرگە و سوپای عێراق. زیاتر لە هەزار کیلۆمەتر لە سنووری موسڵەوە تاوەکو دەگاتە سنووری خانەقین بۆشایی ئەمنی هەیە.

 

لێدوانی فەرمی: سیروان بارزانی، بەرپرسی میحوەری شەشی هێزەکانی پێشمەرگە کە دەکاتە مەخموور - گوێڕ بە ئاڤا نیوزی ڕاگەیاند: جموجۆڵەکانی داعش زیادی کردووە و بەشێوەی پارتیزانی دەگەڕێن، ڕەنگە هۆکارەکەی ئەوە بێت کە ماوەیەکی زۆرە پێشمەرگە و هێزە عێراقییەکان بەهۆی گەرماوە ئۆپەراسیۆنیان نەکردووە.

 

مەترسییە زانراوەکان: بەگوتەی سیروان بارزانی، چەکدارانی داعش بۆ دەرفەت دەگەڕێن بۆ ئەوەی هێرش بکەنە سەر سوپای عێراق و پێشمەرگە و تەنانەت خەڵکی مەدەنیش، هەر وەک چۆن لە کەرکووک و قەرەداغ ڕووی دا.