قەرزی خانووبەرە دەدرێتە هاووڵاتیان و فەرمانبەران و خانەنشینان

ئاڤا نیوز

 

بانکی ڕافیدەین قەرزی خانووبەرە دەداتە هاووڵاتیان، فەرمانبەران و خانەنشینان و بەرزترین بڕی قەرزەکەش دەگاتە 150 ملیۆن دینار و لە ماوەی 15 ساڵدا بە ڕێژەی سوودی 6٪ لێیان وەردەگیرێتەوە.

 

ڕاگەیێنراوی فەرمی: فەرمانگەی بانکی ڕافیدەینی حکومی لە ڕاگەیێنراوێکدا، وردەکاری پێدانی قەرزەکە و مەرجەکانی ئاشکرا دەکات و ئاماژە بۆ ئەوە دەکات، سێ جۆری قەرز بە هاووڵاتیان، فەرمانبەران و خانەنشینان دەدەن.

 

 قەرزەکان بەمجۆرە دەبێت:

- لە 50 تاوەکو 75 ملیۆن دینار بە مەبەستی کڕینی پارچە زەوی.
- لە 15 تاوەکو  75 ملیۆن دینار بە مەبەستی بیناسازی و نۆژەنکردنەوەی خانوو.
- لە 50 تاوەکو 150 ملیۆن دینار بە مەبەستی کڕینی خانوو یان شووقە یان یەکەیەکی نیشتەجێبوون لە کۆمەڵگە نیشتەجێبووەکان.

 

مەرجەکان:

- بۆ فەرمانبەران: قەرزەکە دەدرێتە ئەو فەرمانبەرانەی مووچەکانیان لە بانکی ڕافیدەین وەردەگرن، دەبێت ماستەرکارت و تاپۆیەکی خانووبەرە وەک ڕەهن پێشکەش بە بانک بکرێت.
- بۆ هاووڵاتییان: ئەوانیش دەتوانن لە قەرزەکە سوودمەندبن، بەو مەرجەی فەرمانبەرێک کە مووچەکەی لە بانکی ڕافیدەین بە بانکیکراوە ببێتە کەفیلی لەگەڵ دانانی تاپۆیەکی خانوو وەک ڕەهن.
بۆ خانەنشینان: تەمەنیان لە چوارچێوەی تەمەنی بیمەدابێت تاوەکو کۆتایی ماوەی قەرزەکە، ئەوانیش دەبێت ماستەرکارت و تاپۆیەکی خانووبەرە وەک ڕەهن پێشکەش بە بانک بکات.