پارێزگاری نەینەوا پەکەکە بە هۆکاری ئاوەدان نەکردنەوەی شنگال دادەنێت

ئاڤا نیوز

لە چاوپێکەوتنێکی تەلەفزیونیدا، پارێزگاری نەینەوا ڕەخنەی توند لە پەكەكە دەگرێت و بە بەشێک لە هۆکاری ئاوەدان نەکردنەوەی شنگالی دادەنێت. 

 

چیرۆكه‌ سه‌ره‌كیه‌كه‌: 10 ساڵ لەمەوبەر شنگال لەلایەن داعش داگیر کرا، دواتر لەلایەن هێزەکانی پێشمەرگە ئازاد کرایەوە، بەڵام هێشتا قەزاکە ئاوەدان نەکراوەتەوە و زۆربەی ئاوارەکانیش نەگەڕاونەتەوە. دوای تێپەڕبوونی چوار ساڵیش هێشتا ڕێککەوتنی هەولێر و بەغدا بۆ ئاساییکردنەوەی دۆخی قەزاکە جێبەجێ نەکراوە، کە دیارترین خاڵی دەرکردنی هێزە چەکدارەکانی حەشدی شەعبی و پەکەکەیە.

 

لێدوانی فەرمی: عەبدولقادر دەخیل، پارێزگاری نەینەوا ڕایگەیاند: بوونی پارتی کرێکارانی کوردستان (پەكەكە) ئاستەنگی بۆ ئاوەدانکردنەوەی تەواوەتی شنگال درووست کردوە. 

 

زانیاریی زیاتر: پارێزگاری نەینەوا داوا دەكات چەكدارانی پەكەكە، کە لەلایەن حکومەتی فیدراڵەوە وەک ڕێکخراوێکی قەدەغەکراو دەناسرێت، لە شنگال بکشێنەوە، بۆ ئەوەی دەستی ئاوەدانی بگاتە ناوچەكە.

 

ئەمەش بزانە: ئازاری ڕابردوو سەرۆکوەزیرانی عێراق سەردانی قەزای شنگالی کرد و چەند بڕیارێکی بۆ گەڕاندنەوەی ئاوارەکانی ئەو دەڤەرە دەرکرد، دیارترینیان تەرخانکردنی بڕی 50 ملیار دینارە بۆ ئاوەدانکردنەوەی قەزاکە، بەڵام تائێستا زۆربەی ئەو بڕیارانە جێبەجێنەکراون.