هەزاران پاتریی ساختەی ئۆتۆمبێل لە بازاڕەكانی هەرێمی كوردستان ساغكراونەتەوە

ئاڤا نیوز 

 

لە سنووری سلێمانییەوە هەزاران پاتریی ساختەی ئۆتۆمبێل براون بۆ شار و شارۆچكەكانی هەرێمی كوردستان و ساغكراونەتەوە، كۆمپانیایەك لە ئێرانەوە هاوردەی كردوون و پاتریی 25 ئەمپێری بە 60 ئەمپێر فرۆشتووە.

چیرۆكی سەرەكی: كۆمپانیایەك لە ڕێگەی دەروازە سنوورییەكانی نێوان ئێران و پارێزگای سلێمانی هەزاران پاتری ئۆتۆمبێل و ستیكەری ساختەی پاتری هاوردەی هەرێمی كوردستان دەكات و لە كۆگایەك ستیكەرە ساختەكان لە پاترییەكان دەدات، هەرچەندە پاترییەكان  25- 30 ئەمپێر بوونە بەڵام بە 60 ئەمپێر بە بازاڕ فرۆشراون.

 

زانیاریی پەیامنێر: ڕزگار كۆچەر، پەیامنێری ئاڤا لە هەولێر ڕایگەیاند: بەڕێوەبەرایەتیی ئاسایشی ئابووریی هەرێمی كوردستان  بە هەماهەنگیی بەرێوەبەرایەتیی ئاسایشی هەولێر، دەستی بەسەر 12 هەزار پاتریدا گرتووە و خاوەنی كۆمپانیاكە و هەشت كارمەند كە خەڵكی وڵاتی هیندستانن دەستگیر كراون.

ڕاگەیێنراوی فەرمی: بەپێی ڕاگەیێنراوێكی بەڕێوەبەرایەتیی ئاسایشی ئابووریی هەرێمی كوردستان، دوای هێنانی پاترییەكان لە ئێرانەوە، كۆمپانیاكە لە كۆگایەك لە هەرێمی كوردستان لۆگۆی بازرگانی و ستیكەری ( RKk - BEHEZ -NUR - KUMUHU- GNX )ی لە پاترییەكان داوە و فرۆشتوویەتییەوە بە فرۆشگاكانی پاتریی ئۆتۆمبێل.

 

ئەوەش بزانە: بەپێی ڕاگەیێنراوەكە، ئێستا زیاتر 20 هەزار پاتریی لەو جۆرە ساختەیەی كە دەستیان بەسەردا گیراوە لە بازاڕەكانی هەرێمی كوردستان ساغ كراونەتەوە، نە كڕیار و نە فرۆشیاریش هەستیان بە ساختەكارییەكە نەكردووە.