پارتی دەست بە گۆڕانکاریی ناوخۆی دەکات

ئاڤا نیوز

 

پارتی دیموکراتی کوردستان بەنیازی گۆڕانکاری و چاکسازییە لەسەر ئاستی ناوخۆی حزب و لە حكومەتدا، ڕاوێژکارێکی مەکتەبی سیاسیی پارتیش دەڵێت، 'سکاڵای زۆر هەیە و پێداچوونەوە دەکەین، ئێستاش سەرقاڵی هەڵسەنگاندنین بۆ ئەوەی لەسەر ئەو بنەمایە بڕیاری گۆڕانکارییەکان بدەین'.

 

لێدوانی فەرمی: عارف ڕوشدی، ڕاوێژکاری مەکتەبی سیاسیی پارتی بە ئاڤا نیوزی ڕاگەیاند: بڕیارە لیژنەیەک بۆ گۆڕانکاری پێکبهێرێت، گۆڕانکاری پێویست بەگوێرەی ڕێنماییەکان دەکرێت، چونکە حزب پێویستی بە پێداچوونەوە هەیە.

 

ڕاوێژکارەکەی مەکتەبی سیاسیی پارتی گوتی: هەر ئاستێک پێویستی بە گۆڕانکاری هەبێت، چ لە حزب، چ لە حکومەت گۆڕانکارییان تێدا دەکرێت، گوێ لە گلەیی و ناڕەزایەتی جەماوەر دەگیرێت و پێداچوونەوەیان بۆ دەکرێت، ئێستاش خەریکی هەڵسەنگاندنین و لەسەر ئەو بنەمایە گۆڕانکاری دەکرێت.

 

لەلایەکی دیکەوە: عارف ڕوشدی دەڵێت: دوای ڕاگەیاندنی ئەنجامەکان گەڕێکی دیکەی سەردانەکانمان بۆ لای لایەنەکان دەستپێدەکەینەوە و بەرنامەی خۆمانیان پێ دەڵێین، تاوەکو بزانین لەگەڵمان دەبن بۆ پێکهێنانی حکومەت.

 

باکگراوند: لە ڕێککەوتی 06-11-2022، کۆنگرەی 14ی پارتی دیموکراتی کوردستان كۆتاییهات‌، هەر لەو کۆنگرەیە دا 41 کەس لە پڕۆسەی دەنگدان وەکو ئەندامی کۆمیتەی ناوەندی هەڵبژێردران، هەر لە کۆنگرەی 14ـی پارتیدا، 10 کەسی دیکە بە دەنگدانی راستەوخۆ و بە ئاشکرا لەسەر داوای سەرۆک بارزانی، دەنگیان پێدرا بۆ کۆمیتەی ناوەندیی پارتی هەڵبژێردران.  جگە لەمانە، نۆ کاندید بە کاندیدی یەدەگ هەڵبژێردران