هیندستان دەرفەتی ڕاهێنان پێشکەش بە قوتابییانی هەرێمی کوردستان دەکات

ئاڤا نیوز 

كونسوڵخانەی هیندستان بەهەماهەنگی لەگەڵ حكومەتی هەرێمی كوردستان ژمارەیەك خولی ڕاهێنان و كورسی خوێندنی باڵا بۆ فەرمانبەران و قوتابیانی هەرێمی كوردستان ڕادەگەیەنێت، کە خەرجی بەشداریكردن لە ئەستۆی حكومەتی ئەو وڵاتەیە.

 

وێنە گەورەكە: لەچوارچێوەی پڕۆگرامی ساڵانەی هەماهەنگیی نێوان حكومەتی هەرێمی كوردستان و وەزارەتی دەرەوەی حكومەتی هیندستان، جارێكی دیكە پڕۆگرامی "ITEC" ڕادەگەیێنرێت كە ژمارەیەك كۆرسی زانستی و ئەكادیمی بۆ فەرمانبەران لەخۆدەگرێت، جگە لە دابینكردنی دەیان كورسی خوێندنی باڵا بۆ دەرچووانی زانكۆ لە هەرێمی كوردستان.

 

ڕاگەیێنراوی فەرمی: كونسوڵخانەی هیندستان لە هەولێر لە ئەژماری فەرمی خۆی ڕایگەیاند، خوازیاران لەڕێگەی ئەپڵیكەیشنێكەوە دەتوانن داواكارییەكانیان بۆ بەشداریكردن لە خولەكانی ڕاهێنان یاخود بەدەستهێنانی كورسی خوێندن پێشكەش بكەن و مەرجی وادەیەكی دیاریكراو بۆ پێشكەشكردن ئاماژەی پێ نەكراوە. 

 

مەرجەكان چین: خوازیاران بۆ بەشداریكردن لە كۆرسەكانی خولی ڕاهێنان پێویستە فەرمانبەری حكومی بن، تەمەنیان لەنێوان 25 بۆ 45 ساڵ بێت، هەروەها زمانی ئینگلیزی بە باشی بزانێت. بۆ خوێندنی باڵاش، پێشكەشكار دەبێت هاووڵاتی هەرێمی كوردستان بێت و دەرچووی یەكێك لە زانكۆ باوەڕپێكراوەكان بێت.
 
خوازیاران لەڕێگەی ئەم بەستەرەوە دەتوانن داواكاری پێشكەش بكەن.