موقتەدا سەدر داوا دەکات کەس سەردانی نەکات

ئاڤا نیوز 

 

وەک ناڕەزایی دەربڕین بەرامبەر بە کردەوەی هەندێک لە لایەنگرانی، موقتەدا سەدر، ڕێبەری ڕەوتی نیشتمانی شیعە بڕیاریدا لە ژیانی گشتی دوور بکەوێتەوە و کەس نەبینێت.

 

زانیاریی بەدەستهاتوو: سەرچاوەیەک لە ئۆفیسی سەدر بە میدیای عێراقی ڕاگەیاندووە "سەدر بەهۆی ڕووداوەکەی نەجەف بڕیاری دا لە خەڵک خۆی بە دوور بگرێت".

 

سەرچاوەکە ئەوەشی خستووەتەڕوو کە "هۆکاری ئەم بڕیارە ئەوەبوو سەدر هەستی کردبوو تاوەکو ئەو ساتەش خەڵک لە پشت پیلانەکانی ڕۆژئاوا و گەندەڵەکانەوە دوور لە حەز و ئارەزوو و ڕێنماییەکانی ئەو ڕادەکێشرێن.

 

ئەوەی پێویستە بیزانیت: ڕۆژی 9-12-2024  ژمارەیەک کەسانی سەر بە ڕەوتی سەدر وێنەی کەسایەتی و سەرکردەکانی بەرەی مقاوەمەیان لە نەجەف دڕاند. دواتر  هەر زوو ئەو کەسانە دۆزرانەوە و ڕادەستی هێزە ئەمنییەکانیان کردن.

 

لەلایەکی دیکە: پێشتر موقتەدا سەدر، لە پەیامێکدا هۆشداریی دابوو لەبارەى بڵاوبوونەوەى فیتنەگێڕى لە عێراق لە بەرژەوەندى ناوخۆی و دەرەکى هەندێک لایەن و  ئاماژەی بۆ ئەوە کردبوو پارێزگارى لە عێراق و ناوبانگ و پیرۆزییەکانى بکەن.