لە دۆڵی خاسەی پارێزگای کەرکووک مەفرەزەیەکی داعش کوژران

ئاڤا نیوز

 

هێزی ئاسمانی عێراق بە فڕۆکەی ئێف-16 هێرشێکی ئاسمانی دەکاتە سەر چەکدارانی داعش لە دۆڵی خاسە لە پارێزگای کەرکووک.

 

وێنە گەورەکە: لەگەڵ ئەوەی حەوت ساڵ بەسەر کۆتاییهاتنی ڕێکخراوی داعش لە عێراق تێدەپەڕێت، بەڵام تا ئێستا شانە نووستووەکانی ئەو ڕێکخراوە، جار جارە چالاکی دژی هێزە ئەمنییەکان و هاووڵاتییان ئەنجام دەدەن.

 

ڕاگەیێنراوی فەرمی: شانەی ڕاگەیاندنی ئەمنیی عێراق بڵاویکردەوە: دوای کۆکردنەوەی زانیاریی هەواڵگری، ئێوارەی ئەمڕۆ مەفرەزەیەک لە چەکدارانی داعش لە دۆڵی خاسەی سەر بە پارێزگای کەرکووک بە فڕۆکەی ئێف-16 کرایە ئامانج.

 

ڕاگەیێنراوەکە ئەوەشی خستەڕوو، ئەو شوێنەی کراوەتە ئامانج کەوتووەتە نێو چوارچێوەی کەرتی فەرماندەیی ئۆپەراسیۆنەکانی کەرکووک، پێشبینی دەکرێت سەرجەم چەکدارانی داعش لەو مەفرەزەیە کوژرابن.