حووسییەکانی یەمەن مووشەک ئاڕاستەی ناوەڕاستی ئیسرائیل دەکەن

ئاڤا نیوز

 

بەرەبەیانی ئەمڕۆ گرووپی "ئەنساروالڵە"ـی سەربە حووسییەکان لە یەمەنەوە مووشەکێکیان ئاڕاستەی تەلئەڤیڤ کرد و بەهۆیەوە چەندین کەس بریندار بوون.

 

وێنە گەورەکە: ئیسرائیل لە دوای ئەوەی شەڕی دژ بە حیزبوڵڵای لوبنان  و چەکدارانی بزووتنەوەی حەماس لە غەززە دەستپێکرد، کە ئامانج لێی دوورخستنەوەی مەترسی ئەو گرووپانە بوو لەسەر ئاسایشی وڵاتەکەی، ئێستا سەرەڕای هەڕەشەکانی نەتانیاهۆ لەبارەی هێرشی حووسییەکانەوە، ئەو گرووپە گوێ بە هەڕەشەکان نادات و بەردەوامە لە بە ئامانجگرتنی ئیسرائیل.

 

ڕاگەیێنراوی فەرمی: وتەبێژی سوپای ئیسرائیل ڕایگەیاند: هێزی بەرگریی ئاسمانی وڵاتەکەی نەیتوانیوە ڕێگری لە مووشەکێک بکات کە لە یەمەنەوە ئاڕاستەی تەلئەڤیڤ کرابوو و تا ئێستا وردەکارییەکانی لەژێر لێکۆڵینەوەدایە.

 

لەلایەکی دیکەوە: بەگوێرەی ڕۆژنامەی تایمز ئۆف ئیسرائیل لە ئەنجامی هێرشەکە نزیکەی 14 کەس برینداربوون و زیانی ماددیش بەر چەند باڵەخانەیەک کەوتووە.