وەزیری بەرگریی ئیتاڵیا بە سەردانێکی فەرمی گەیشتە هەرێمی کوردستان

ئاڤا نیوز

 

ئێوارەی ئەمڕۆ، گیدۆ کرۆسێتۆ، وەزیری بەرگریی ئیتاڵیا بە سەردانێکی فەرمی گەیشتە شاری هەولێر و لەلایەن بەرپرسانی باڵای هەرێمی كوردستانەوە پێشوازیی لێکرا.

 

چیرۆکی سەرەکی: گویدۆ و كرۆسێتۆ، دووەم جارییەتی سەردانی هەرێمی کوردستان دەکات، یەكەم سەردانی لە ڕۆژی 2-5-2023 بوو. لە سەردانەكەیدا بۆ شاری هەولێر، سەرەڕای كۆبوونەوەی لەگەڵ بەرپرسانی باڵای هەرێمی كوردستان، وابڕیارە هێزەكانی وڵاتەكەشی كە چەندین ساڵە لە هەرێمی كوردستانن بەسەربكاتەوە.

 

ئەوەی پێویستە بیزانیت: ئیتاڵیا یەكێكە لە وڵاتانی ئەندام لە هاوپەیمانییەتی نێودەوڵەتی بۆ شەڕی دژی داعش و لە ڕابردوودا ڕۆڵی گرنگ و بەرچاوی هەبووە لە یارمەتیدانی هێزی پێشمەرگە، لە شەڕی داعشەوە هێزەكانی ئیتاڵیا لە هەرێمی كوردستانن. هاوکات ئیتاڵیا كونسوڵخانەی فەرمییان لە هەرێمی کوردستان لە شاری هەولێر هەیە.

 

ئەمەش بزانە: سوپای ئیتاڵیا  لە ماوەی 10 ساڵی ڕابردوودا لە ڕێگەی تیمەکانی ڕاوێژكاری و ڕاهێنەرە سەربازییەكانیان دەیان خولی سەربازیی جۆراوجۆریان بۆ هێزەكانی پێشمەرگە كردووەتەوە، ئەمە جگە لەو هاوكارییانەی لەڕووی دابینكردنی چەك و كەلوپەل و پێداویستیی پزیشكییەوە کە پێشكەشی هەرێمی كوردستانیان كردووە. هاوکات بەر لە چەند مانگێك كۆمەڵێك كەلوپەل و ئامێر و پێداویستیی پزیشكییان پێشكەشی نەخۆشخانەی ڕاپەڕینی تایبەت بە منداڵان لە شاری هەولێر كرد.

 

زانیاریی زیاتر: دوای تەواوبوونی شەڕی داعش، هاوشێوەی وڵاتانی دیكەی هاوپەیمانیی، ئیتاڵیا ژمارەی سەربازەكانی لە هەرێمی كوردستان كەمكردەوە و ئێستا 60 ڕاهێنەر و 300 سەربازی ئیتاڵی لە هەرێمی كوردستانن کە ئەركیان تەنیا مەشق و ڕاهێنانە بە هێزەكانی پێشمەرگە و لەم كارەشیان بەردەوامن.