شارەزایەکی ئابووری: 71٪ـی بودجە بۆ مووچە دەچێت

ئاڤا نیوز

 

شارەزایەکی ئابووری لە عێراق ئاماژە بۆ ئەوە دەکات کە 71٪ـی پارەی تەرخانکراو بۆ بودجە بۆ مووچەی فەرمانبەران و چاودێری کۆمەڵایەتی دەچێت.

 

وێنە گەورەکە: ژمارەی زۆری مووچەخۆر لە عێراق وایکردووە ساڵانە ڕێژەیەکی بەرچاو لە پارەی بودجە بۆ مووچەخۆران بچێت و هاوکات بەهۆی خەرجی زۆرەوە کورتهێنان لە بودجە دروست ببێت.

 

لێدوانی فەرمی: نەبیل مەرسومی، شارەزای ئابووریی عێراق ڕایگەیاند: " تاوەکو مانگی تشرینی یەکەمی ئەمساڵ بڕی پارەی تەرخانکراو بۆ مووچەی فەرمانبەران گەیشتووەتە 49 تریلیۆن و 456 ملیۆن دینار، بە تێکڕای مانگانە 4.9 ترلیۆن دینار، کە بەرزترین مووچەیە لە مێژووی عێراقدا.

 

-  ئەو بڕە تەرخانکراوەشی بۆ چاودێری کۆمەڵایەتی خەرجکراوە لە هەمان ماوەدا، دەگاتە 22 تریلیۆن دینار، بۆ هەردووکیان بڕەکە دەاگاتە 71 تریلیۆن و 456 ملیۆن دینار.

 

-  هەردوو بڕەکە زیاتر لە 71٪ـی خەرجی بەکاربردن پێکدەهێنن، کە دوو لەسەر سێی داهاتی نەوتی لەو ماوەیەدا پێکدەهێنێت.

 

ئەوەی پێویستە بیزانیت: کۆی گشتیی بودجەی ساڵی 2024ی عێراق، 211 تریلیۆن و 861 ملیار و 312 ملیۆن و 504 ھەزار دینارە و کۆی گشتیی داھاتەکەشی 147 تریلیۆن و 836 ملیار و 655 ملیۆن و 889 دینارە.

 

-  کۆی گشتی خەرجییەکانی بودجەی گشتیی عێراق بۆ ساڵی 2024، 211 تریلیۆن و 800 ملیار دینارە، لە کاتێکدا خەرجیی بودجەی ساڵی 2023، 198 تریلیۆن و 900 ملیار دینار بوو.

 

-  بڕی کورتھێنان لە بودجەی گشتیی ساڵی 2024، بە 63 تریلیۆن دینار خەمڵێندراوە، لە کاتێکدا بڕی کورتھێنان لە بودجەی گشتیی ساڵی 2023، 64 تریلیۆن و 300 ملیار دینار بووە.