ئەمساڵ شێوازی دابەشكردنی نەوتی سپی بەسەر هاووڵاتییان دەگۆڕێت

ئاڤا نیوز 

 

لە پارێزگای هەولێر، لەڕێگەی دروستكردنی كۆبۆن و دابەشكردنی بەسەر خێزانەكان، گۆڕان بەسەر شێوازی دابەشكردنی نەوتی سپی دێت و بیرۆكەكە ئەوەیە كە لەمەودوا هاووڵاتییان لەڕێگەی بەنزینخانەكانەوە نەوت وەربگرن.

لێدوانی فەرمی: ئومێد خۆشناو، پارێزگاری هەولێر ڕایگەیاند: بۆ ئەمساڵ بەنیازین سەرجەم بابەتەكانی سووتەمەنی لەڕێگەی كۆبۆنەوە بەسەر هاووڵاتییان دابەش بكەین، ئێستا غازی ماڵان لەڕێگەی كارتێكەوە كە شێوازەكەی كاتییە دەدرێت بە هاووڵاتیاین، بەڵام بیرۆكەكە ئەوەیە لەمەودوا غاز و نەوت بە كۆبۆن بدرێت بە هاووڵاتی و هەر خێزانێك لەڕێگەی بەنزینخانەكانەوە بەشە نەوتی خۆی وەربگرێت، چونكە شێوازی ئێستای دابەشكردنی نەوت كە لەڕێگەی بەرمیلەوەیە ناشارستانی و نەگونجاوە، كۆبۆنەكەش ئەلیكترۆنی دەبێت نەك كاغەز.

 

ئەوەی پێویستە بیزانیت: شێوازی ئێستای دابەشكردنی نەوت بەم شێوەیە:- هەر خێزانێك دەبێت بەرمیلێكی بەتاڵ بباتە لای بریكاری خۆراك و چەند ڕۆژێك لەوێ بەجێیبهێڵێت و پاشان تانكەرێكی پڕ لە نەوت دێت و 200 لیتر نەوت لە هەر بەرمیلێك دەكات و پاشان هەر خێزانێك بەرمیلەنەوتی خۆی دەباتەوە.

 

ئەوەش بزانە: مانگێكە دابەشكردنی غاز گۆڕانی بەسەردا هاتووە و هەر خێزانێك لەلایەن موختاری گەڕەكەكەیەوە كارتێكی پێدەدرێت و بۆی هەیە مانگانە دوو بتڵ غاز بە نرخێكی هەرزانتر لە بازاڕ وەربگرێت.