لە ساڵی 2025 پارەی گەنمی جووتیاران بەشێوەی ئەلیكترۆنی دابەش دەکرێت

ئاڤا نیوز

 

وەزارەتی بازرگانی عێراق داوادەكات لە ساڵی نوێوە پارەی گەنمی جووتیاران بەشێوەی ئەلیكترۆنی بدرێت.

 

وێنە گەورەكە: وەزارەتی بازرگانی عێراق، پلان و كارنامەی ساڵی نوێی كاركردنی بڵاودەكاتەوە و لە گرنگترین دەسپێشخەریشدا؛ كار بۆ بەدیجیتاڵكردنی پرۆسەی وەرگرتنی گەنمی جووتیاران و پێدانی شایستەكانیان دەكات.

 

ڕاگەیێنراوی فەرمی: ئەسیر داوود غەریری، وەزیری بازرگانی عێراق لە ڕاگەیێنراوێكدا ئاماژەی بەوە كردووە، بە مەبەستی ئاسانكاری بۆ بە بازاڕكردنی بەروبوومی جووتیاران و بە ئاسان بەدەست گەیشتنی شایستەكانیان، پلانیان داڕشتووە لەمەودوا شایستەی دارایی جووتیاران بەشێوەی ئەلیكترۆنی دابەش بكەن.

 

زانیاریی زیاتر: هەر لە چوارچێوەی پلانی وەزارەتی بازرگانی عێراق بۆ ساڵی نوێ؛ بڕیاردرا بە پێكهێنانی ئەنجوومەنی بەڕێوەبەریی كۆمپانیاكانی بازرگانی دانەوێڵە و پرۆسەكردنی دانەوێڵە پاڵپشت بە یاسای كۆمپانیا گشتییەكان ژمارە 22ـی ساڵی 1997ـی هەمواركراو.

 

 ئەوەی پێویستە بیزانیت: وەزارەتی بازرگانی عێراق توانای عەمباركردنی زیاتر لە یەك ملیۆن تۆن گەنمی هەیە، بۆ ئەمەش هەماهەنگی لەگەڵ وەزارەتی كشتوكاڵ و دەزگا ئەمنییەكان و ئیدارە خۆجێییەكان بۆ لابردنی ئاستەنگەكانی بەبازاڕكردنی بەرهەمی جووتیاران، بە پێویست دەزانێت.