یەکێتی زانایانی ئیسلامی: ڕێژەی جیابوونەوەی هاوسەران کەمی کردووە

ئاڤا نیوز

 

 لیژنەی باڵای فەتوای هەرێمی کوردستان ئاماری کێشە خێزانییەکانی ساڵی ڕابردووی بڵاوکردەوە و ڕایگەیاند: دەستێکی باڵایان لە چارەسەرکردنی کێشەکان هەبووە.

 

وێنە گەورەکە: ئەمڕۆ شەممە، یەکێتی زانایانی ئایینی ئیسلامی کوردستان ئاماریی کار و چالاکییەکانی ساڵی ڕابردووی بڵاوکردەوە کە زیاتر بابەتی خێزانین و زۆرینەیان چارەسەر کراون لەلایەن یەکێتییەکەوە.

 

لێدوانی فەرمی: د.عەبدوڵڵا شێرکاوەیی، وتەبێژی یەکێتیی زانایانی ئایینی ئیسلامی کوردستان بە ئاڤا نیوزی گوت: ساڵی ڕابردوو لە کۆی سێ هەزار و461 کێشەی خێزانی، هەزار و 340 حاڵەتی جیابوونەوە هەبووە، واتە ئەوان توانیویانە دوو هەزار و 121 کێشەی خێزانی چارەسەر بکەن.

 

زانیاریی زیاتر: کێشەکان بەم شێوازە بوون، هەزار و 78 کێشەی میرات و زەوی و زار بوون، هەزار و 168 کێشەی مامەڵەی بازرگانی و کڕین و فرۆشتن بووە، هاوکات 522 کێشەی کۆمەڵاتی و خێزانی داوایان کردووە ئاشتەواییان بۆ بکرێت.

 

ئەوەی پێویستە بیزانیت: بەگوێرەی ئەو ئامارە بێت کیشە خێزانییەکان بەراورد بە ساڵی 2023 ڕووی لە زیادبوون کردووە بەڵام ڕێژەی جیابوونەوە کەمیکردووە، چونکە ساڵی 2023 ژمارەی کێشە خێزانییەکان دوو هەزار و 828 کێشە بوون، ڕێژەی جیابوونەوەش هەزار و 391 بووە.