شرۆڤەکارێکی تورک: تورکیا پشت بە هەڵوێستەکانی مەسرور بارزانی دەبەستێت

ئاڤا نیوز 

 

موهەند حافز ئۆغڵۆ، شرۆڤەکاری تورک لە بەرنامەی نان و چای ئاڤا میدیا بەشداریکرد و ڕایگەیاند، تورکیا پشت بە هەڵوێستەکانی سەرۆکوەزیران مەسرور بارزانی دەبەستێت لە بەرەنگاربوونەوەی تیرۆر و پێشهاتەکانی ناوچەکەدا.

 

وێنە گەورەکە: دوای ڕووخانی دەسەڵاتی بەشار ئەسەد لە سووریا قۆناغێکی نوێ لە ناوچەکە هاتووەتە ئاراوە، وڵاتانی زلهێزی جیهان چاویان لە ئایندەی سووریایە و تورکیاش وەک یاریکەرێکی سەرەکی ناوچەکە ڕۆڵ و پێگەی کاریگەری هەیە لەسەر ئایندەی سووریا و ناوچەکە بەگشتی، لەلایەکی دیکەشەوە پرسی ئاشتی و دانوستانی لایەنەکانی تورکیا پەیوەست بەم بابەتە چاوەڕێی گۆڕانکاری گەورەی لێ دەکرێت، بۆیە هەرێمی کوردستانیش وەک بەشێکی گرنگ لە ناوچەکە لە هەموو گۆڕانکارییەکاندا ڕۆڵی کاریگەر دەگێڕێت.

 

لێدوانی فەرمی: موهەند حافز ئۆغڵۆ، لێکۆڵەری پەیوەندییە نێودەوڵەتییەکان و شارەزا لە کاروباری تورکیا بە ئاڤا میدیای گووت، سەردانەکەی بارزانی بۆ تورکیا زیاتر ئەمنییە، تورکیا لەبەردەم دۆخێکی نوێ و هەستیاردایە بەهۆی ڕووخانی ڕژێمی سووریا، بۆیە پشت بە هەڵوێستی مەسرور بارزانی و حکومەتی هەرێمی کوردستان دەبەستێت لەبواری ئەمنی و سیاسی بۆ بەرەنگاربوونەوەی تیرۆر، هەڵوێستی بارزانی بۆ تورکیا یەکلاکەرەوەیە.

گووتیشی، ڕووخانی ڕژێمی سووریا کاریگەریی لەسەر هەموو عێراق دەبێت، بۆیە پێویستە هاوکاریی ئەمنی و هەماهەنگیی هەواڵگیری هەبێت لە نێوان تورکیا و هەرێمی کوردستان لەلایەک و لە نێوان ئەنقەرە و بەغداش لەلایەکی دیکە.

موهەند حافز ئۆغڵۆ دەربارەی پاڵپشتییەکانی ئەمریکا لە هێزەکانی سووریای دیموکرات قسەی کرد و گووتی، "کێشەی سەرەکیی تورکیا ئەوەیە ئەمریکا سیاسەتی دووفاقی دەکات، لە کاتێکدا دەڵێت هاوپەیمانیی سەرەکییمان تورکیایە و لەهەمان کاتدا پاڵپشتی هەسەدە دەکات، ئەمەش قبوڵکراو نییە، ئەمریکا نایەوێت ئەم کێشەیە لەگەڵ تورکیا چارەسەر بکات بەڵکو ئیدارەی کێشەکە دەکات و تورکیا و هەسەدە وەکو دوو هاوپەیمانی خۆی دەهێڵێتەوە، بەلای تورکیاوە ئەمە قبوڵکراو نییە.

 

ئەوەی پێویستە بیزانیت: ئەمڕۆ سێشەممە، سەرۆکوەزیران مەسرور بارزانی، بە سەردانێکی فەرمی گەیشتە تورکیا و سەرەتا لەگەڵهەر یەک لە سەرۆککۆمار، ڕەجەب تەیب ئەردۆغان و هاکان فیدان وەزیری دەرەوەی ئەو وڵاتە کۆبوونەوە.