ئەندامێکی لیژنەی دارایی: ئەگەری زیادکردنی تێچووی گواستنەوە و دەرهێنانی نەوتی هەرێمی کوردستان هەیە

ئاڤا نیوز

 

پەرلەمانی عێراق لە دوای کۆبوونەوەی خۆی لە بارەی هەموار یاسای بودجە، باسی کێشە و بەربەستەکانی بەردەمی کرد،  لە کۆبوونەوەکەدا باس لە دەستپێکردنەوەی هەناردەی نەوتی کوردستان کرا و چەند پێشنیازێک خراونەتەڕوو، ئەندامێکی لیژنەی داراییش ئاماژە بەوە دەدات، ئەگەر زیادکردنی ئەو 16 دۆلارە هەیە کە وەک تێچووی دەرهێنان و گواستنەوەی نەوتی کێڵگەکانی هەرێمی کوردستان دیاریکراوە.

 

وێنە گەورەکە: نزیکەی دوو ساڵە هەناردەی نەوتی هەرێمی کوردستان لەڕێگەی بەندەری جەیهانی تورکیاوە وەستاوە، زیانەکەی بە سەروو 20 ملیار دۆلار مەزەند دەکرێت، ئێستا ڕێککەوتنی نوێ کراوە و لە قۆناغی یەکەم 16 دۆلار بۆ کۆمپانیاکانی دەرهێنانی نەوت خەرج دەکرێت.

 

لێدوانی فەرمی: د.نەرمین مەعرووف، ئەندامی لیژنەی داریی لە ئەنجوومەنی نوێنەرانی عێراق، ڕایگەیاند: "ڕەنگە ئەو 16 دۆلارەی دیاریکراوە زیاد بکات، چونکە ڕوونە کە تێچووی گواستنەوە و دەرهێنان لە کێڵگەکانی هەرێمی کوردستان بڕێکی زیاتری پێویستە و لەماوەی داهاتوو ئەگەری گۆڕانکاریی لەو بڕە هەیە."

 

لەلایەکی دیکەوە: پێشووتر کەمال محەممەد، وەزیری سامانە سرووشتییەکانی هەرێمی کوردستان بەوەکالەت بە ئاڤای گوتبوو، دوای تەواوبوونی ڕێکارەکانی هەناردەکردنەوەی نەوتی هەرێمی کوردستان ، ساڵی 2025 دەست بە پرۆسەکە دەکرێتەوە.