دوایین زانیاریی لەبارەی گیانلەدەستدان و برینداربوونی عومرەکارانی کورد لە سعودییە

ئاڤا نیوز

پاسێکی عومرەکاران لەڕێگەی سعودییە تووشی ڕووداوی هاتوچۆ دەبێت و تاوەکو ئێستا هاتووچۆی ئەو وڵاتە ڕوونکردنەوەی لەبارەی هۆکاری ڕووداوەکە نەداوە.

 

چیرۆکی سەرەکی: پاسەکە لە چەمچەماڵەوە بەرەو سعودییە بەڕێکەوتبوو، لە سنووری عەرعەر تووشی ڕووداوێکی هاتوچۆ دەبێت و بەهۆیەوە عومرەکارێک گیانی لەدەستدا و 25 کەسیش بریندابوون، وتەبێژی حەج و عومرەی هەرێمی کوردستانیش دەڵێت، ئەگەر پێویست بکات لیژنەی لێکۆڵینەوە پێکدەهێنین.

 

لێدوانی فەرمی: کاروان ستوونی، وتەبێژی بەڕێوەبەرایەتی حەج و عومرەی هەرێمی کوردستان بە ئاڤا میدیای ڕاگەیاند: لە ڕووداوەکە عومرەکارێک گیانی لەدەستداوە و 25 کەسی دیکەش بە سووکی بریندار بوون، هەر دوای ڕووداوەکە بریندارەکان گواسترانەوە بۆ نەخۆشخانەکان و چارەسەری پێویستییان بۆ کرا و هەندێکیان تا ئێستا لە ژێر چاودێریی پزیشکیدان.

 

کاروان ستوونی، گوتیشی، لیژنەیەکی تایبەت لەلایەن بەڕێوەبەرایەتییەکەیان بۆ لێکۆڵینەوە لە هۆکاری ڕووداوەکە پێکدەهێنرێت.

 

ئەوەی پێویستە بیزانت: مامەڵەکانی تایبەت بە هێنانەوەی ئەو عومرەکارەی گیانی لەدەستدا دەستیپێکردووە و ئەگەر هەیە هەر ئەمڕۆ تەرمەکەی بگەڕێندرێتەوە هەرێمی کوردستان.