کەنەدا  و مەکسیک سزای ئەمریکا دەدەن

ئاڤا نیوز

لە وەڵامی بڕیارەکانی دۆناڵد ترەمپ، کەنەدا پێناسی گومرگی بە ڕێژەی 25٪ بەسەر هاوردەی ئەمریکا بەرز دەکاتەوە و مەکسیکیش هەوڵەکانی دەخاتە گەڕ.

 

چیرۆکە سەرەکییەکە: کەنەدا و مەکسیک بەردەوامن لە بەرگریکردن بەرامبەر ئەمریکا و سزا ئابوورییەکانی دۆناڵد ترەمپ. لە دوایین لێدوانیدا جەستن ترودۆ سەرۆکوەزیرانی کەنەدا بڕیاریدا 25٪ پێناسی گومرگی بەسەر کاڵا و بەرهەمی ئەمریکی بە بەهای 155 ملیار دۆلاری کەنەدی (107 ملیار دۆلاری ئەمریکی) بەرزبکاتەوە.

 

سزاکە بەمشێوەیەیە: سزاکە بەشێوەی قۆناغی جیاواز دەبێت و قۆناغی یەکەم بڕی 30 ملیار دۆلار دەبێت بەشێوەی ڕاستەوخۆ جێبەجێ دەکرێت و ئەوەی دەمێنێتەوە لەماوەی 21 رۆژ جێبەجێ دەکرێت. بەرهەمەکان بەرهەمی سەرەتایی و رۆژانەن کە خواردن، خواردنەوە، پۆشاک و چەند بەرهەمێکی دیکە لەخۆ دەگرێت. لەپاڵ ئەوەشدا چەند کاڵایەکی دیکە لەشێوەی بەرهەمە سروشتییەکان و وزە.

 
هۆکارە زانراوەکان: سەرەتای مانگی شوبات دۆناڵد ترەمپ سزای بەسەر هەریەک لە کەنەدا و مەکسیک بە ڕێژەی 25٪ و چین بە 10٪ بەرزکردەوە. ئەم بڕیارەی کەنەداش وەک وەڵامێکە بۆ سزاکانی ئەمریکا بۆ وڵاتەکەی.

 

لەلایەکی دیکەوە: کلاودیا شینباوم، سەرۆکی مەکسیک فەرمانی بە وەزارەتی دارایی وڵاتەکەی کردووە، ڕێکاری پێویست بگرنەبەر بۆ وەڵامی سزاکانی ئەمریکا و پاراستنی بەرژەوەندییەکانی وڵاتەکەی.

 

زانیاریی زیاتر: وەزیری بازرگانی چین دەڵێت ئەم هەوڵەی واشنتن پێشێلکردنی یاساکانی ڕێکخراوی بازرگانی نێودەوڵەتییە و ئەوان پاڵپشتی لە دیالۆگێكی ڕاشکاوانە دەکەن و داوای هەماهەنگی بەهێز دەکەن.