زیاتر لە 800 بازرگانی ماددەی هۆشبەر لە گرتووخانەكانی هەرێمی كوردستانن

ئاڤا نیوز

بەگوێرەی ئەو زانیارییانەی دەست ئاڤا میدیا كەوتووە، ئێستا زیاتر لە 800 حكومدراو كە تۆمەتی بازرگانیكردن بە ماددەی هۆشبەریان بەسەردا ساغبۆتەوە، لە گرتووخانەكانی شارەكانی هەرێمی كوردستانن.

وێنە گەورەكە: ماوەی چەند ساڵێكە بەكارهێنان و بازرگانیكردن بە ماددە هۆشبەرەكان و كارتێكەرە عەقڵییەكان لە عێراق و هەرێمی كوردستان حاڵەتەوە بووەتە دیاردە، بڕێكی زۆری ماددەی هۆشبەر لە ئێران و پێشتریش لەسەردەمی حكومڕانی ئەسەد، لە سووریا دەهێنرێتە ناوخۆی عێراق، ئامارەكان ئاماژە بە هەڵكشانی ترسناكی ڕێژەی بەكارهێنەران و بازرگانانی ماددەی هۆشبەر دەكات.

زانیاریی بەدەستهاتوو: بەڕێوەبەرایەتی گشتیی چاكسازییەكانی هەرێمی كوردستان سەر بە وەزارەتی كار و كاروباری كۆمەڵایەتی بەهەماهەنگی لەگەڵ بەڕێوەبەرایەتی دیراسات و بەدواداچوونی دیاردەی تاوانكاری، خشتەی ئاماری حكومدراوانی بازرگانان و بەكارهێنەرانی ماددەی هۆشبەری ئامادەكردووە و وێنەیەكی لەلای ئاڤا میدیا پارێزراوە، دەركەوتووە 801 حكومدراو تۆمەتی بازرگانیكردن بە ماددەی هۆشبەریان بەسەردا ساغبۆتەوە و ئێستا لە گرتووخانەكانی شارەكانی هەرێمی كوردستان گیراون، زۆرینەی ئەو ڕێژەیەش لە پارێزگای سلێمانییە.

ژمارەكان وادەڵێن: جگە لە حكومدانی 801 بازرگانی ماددەی هۆشبەر، 716 بەكارهێنەری ماددەی هۆشبەر لە سەرانسەری هەرێمی كوردستان حكومدراون و كۆی گشتی بازرگانان و بەكارهێنەرانی ماددەی هۆشبەر لە گرتووخانەكانی هەرێمی كوردستان 1517 حكومدراون.