زەریف لە بەغدا لەگەڵ بەرپرسانی عێراق کۆدەبێتەوە

ئاڤا نیوز

جێگری سەرۆککۆماری ئێران بۆ کاروباری ستراتیژی لە بەغدا لەگەڵ بەرپرسانی باڵای عێراق کۆدەبێتەوە و یەکەم کۆبوونەوەشی لەگەڵ سەرۆکی ڕەوتی حیکمەی نیشتمانی بوو.

چیرۆکی سەرەکی: درەنگانی شەوی ڕابردوو، محەممەد جەواد زەریف، جێگری سەرۆککۆماری ئێران بۆ کاروباری ستراتیژی لەسەر بانگهێشتی عەممار حەکیم سەرۆکی ڕەوتی حیکمەی نیشتمانی گەیشتە بەغدا.

ڕاگەیێنراوی فەرمی: بە گوێرەی ڕاگەیێنراوی نووسینگەی عەممار حەکیم:

- ئاماژەمان بە پێشهاتەکانی گۆڕەپانی عێراق کرد، کە دەستکەوتی گرنگی بەدەستهێناوە لەسەر ئاستی سیاسیی و ئەمنیی و کۆمەڵایەتیی و ئابووری. هاوکات جەختمان لەسەر پێویستی پاراستنی ئەو دەستکەوتانە بەتایبەتی سەقامگیری کردەوە.

لەلایەکی دیکەوە: بەگوێرەی زانیارییەکانی میدیای ئێران، "بڕیارە سەردانەکەی زەریف بۆ عێراق بۆ ماوەی سێ ڕۆژ بخایەنێت و کارنامەکەی بریتی دەبێت لە کۆبوونەوە و گفتوگۆ لەگەڵ بەرپرسانی باڵای عێراق، بە هەماهەنگی لەگەڵ وەزارەتی دەرەوەی ئێران".

ئەوەی پێویستە بیزانیت: بڕیارە لەم هەفتەیە سێیەمین کۆنفڕانسی زانستی نێودەوڵەتی سەبارەت بە داهاتووی شوێنکەوتووانی ئەهلی بەیت بە ئامادەبوونی کەسایەتییەکانی ناوخۆ و دەرەوەی عێراق لە بەغدا بەڕێوەبچێت، کە لەلایەن ڕەوتی حیکمەی نیشتمانییەوە ڕێکدەخرێت.