هەرێمی کوردستان و ئیتاڵیا پەیوەندییە بازرگانییەکانیان پتەوتر دەکەن

ئاڤا نیوز

 

حکومەتی هەرێمی کوردستان بەردەوامە لە فرەچەشنکردنی سەرچاوەکانی داهات و لەم چوارچێوەیەشدا شاندێک سەردانی ئیتاڵیا دەکات.
 
چیرۆکی سەرەکی: ئەمرۆ دووشەممە 10-2-2025، شاندێکی حکومەتی هەرێمی کوردستان بە سەرۆکایەتیی د. محەممەد شوکری، سەرۆکی دەستەی وەبەرهێنان و سەفین دزەیی، بەرپرسی فەرمانگەی پەیوەندییەکانی دەرەوەی هەرێمی کوردستان، لەگەڵ زیاتر لە 20 وەبەرهێنەر بۆ پتەوکردنی پەیوەندییە بازرگانی و ئابوورییەکان دەچنە ئیتاڵیا.
 
لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤا میدیای ڕاگەیاند: "شاندەکە دیداری لەگەڵ حکومەت و کەرتی تایبەتی ئیتاڵیا دەبێت، لە داهاتووشدا بازرگان و وەبەر‌هێنەرانی وڵاتەکە سەردانی هەرێمی کوردستان دەکەن، تاوەکو لە نزیکەوە دەرفەتەکانی وەبەرهێنان ببینن".
 
ئەوەی پێویستە بیزانیت: لە ماوەی ڕابردوو شاندێکی حکومەتی هەرێمی کوردستان و 11 وەبەرهێنەر بە سەرۆکایەتیی سەرۆکوەزیران مەسرور بارزانی، لە ماڵی کوردستان لە داڤۆس بەشدارییان لە کۆربەندی ئابووری جیهان لە داڤۆس کرد، کە تێێدا دەستپێشخەرانی کار، وەبەرهێنەر و گەورە ناوەندەکانی لێکۆڵینەوەی سیاسی و ئابووری لەسەر ئاستی جیهان بەشداربوون.

 

بۆچی گرنگە: زیاتر لە 50 پرۆژەی وەبەرهینانی بیانی بە سەرمایەی زیاتر لە 11 ملیار، لە دۆلار هەرێمی کوردستان هەن، ئەمەش پەیوەندییە بازرگانی و ئابوورییەکانی هەرێمی کوردستان لەگەڵ وڵاتانی دیکە بەهێزتر دەکات.