دوو شاندی حکومەت و پەرلەمانی عێراق لە کێشەی جووتیارانی کورد دەکۆڵنەوە

ئاڤا نیوز

 

لەسەر ڕووداوەکانی ڕێگریکردنی سوپای عێراق لە جووتیارانی کەرکووک، پێشنیوەڕۆی ئەمڕۆ سێشەممە شاندێکی وەزارەتی دادی عێراق و وەزارەتە پەیوەندیدارەکانی دیکە لە بینایەی پارێزگای کەرکووک لەگەڵ جووتیارانی ناوچەکە کۆدەبنەوە، هاوکات لەسەر ڕاسپاردەی سەرۆک بارزانی شاندی فراکسیۆنی پارتی لە پەرلەمانی عێراق سەردانی جووتیارانی گوندی شەناغە دەکەن و لەگەڵ فەرماندەی ئۆپەراسیۆنە هاوبەشەکان کۆدەبنەوە.

وێنە گەورەکە: نیو سەدەیە پشت ئەستوور بە بڕیاری مەجلس قیادە سەورەی ڕژێمی بەعس کە ئێستا لە پەرلەمانی عێراق بڕیارەکانی ڕژێمی پێشوو هەڵوەشاوەتەوە، لە وەرزی داچاندن و دروێنەدا سوپای عێراق و عەرەبی هاوردە ناهێڵن جووتیارانی کورد زەوییەکانیان بەکاربهێنن.

 

زانیاریی بەدەستهاتوو: لیژنەیەک بەسەرۆکایەتیی بریکاری وەزیری داد و نوێنەرانی وەزارەتە پەیوەندیدارەکان، پێشنیوەڕۆی سبەی سێشەممە لە بینایەی پارێزگای کەرکووک لەگەڵ جووتیارانی ناوچەکە کۆدەبنەوە و لە کێشەکان دەکۆڵنەوە.

 

لەلایەکی دیکەوە: مەریوان قەرەنی، جێگری سەرۆکی فراکسیۆنی پارتی لە پەرلەمانی عێراق بە ئاڤای گوت، "ئەمڕۆ سەردانی شەناغە دەکەین و لەگەڵ جووتیاران کۆدەبینەوە، دواتر لەگەڵ فەرماندەی ئۆپەراسیۆنەکانی کەرکووک کۆدەبینەوە، بۆ ئەوەی ڕوون ببێتەوە کە لەسەر چ بنەمایەک سەربازانی سوپا ئەوەیان کردووە، چونکە ئەرکی ئەوان پاراستنی سنوورەکانە نەک هەڵکوتانە سەر جووتیاران."