سەرۆك بارزانی ئازاردانی جووتیارانی كورد لە كەركووك لەگەڵ جێگری باڵیۆزی ئەمەریكا تاوتوێ دەکات

ئاڤا نیوز

سەرۆک بارزانی پێشوازی لە دانیال ڕۆبنستین جێگری باڵیۆزی ئەمەریكا لە عێراق کرد و دوایین پێشهات و گۆڕانکارییەکانی ناوچەکەیان تاوتوێ کرد.

وێنە گەورەکە: ئەمڕۆ چوارشەممە  لە سەلاحەددین سەرۆك بارزانی پێشوازی لە دانیال ڕۆبنستین جێگری باڵیۆزی ئەمەریكا لە عێراق كرد، بارودۆخی سیاسی و ئەمنی عێراق و سووریا و دوایین پێشهات و گۆڕانكارییەكانی ناوچەكە گفتوگۆ کرا.

ڕاگەیێنراوی فەرمی: بارەگای بارزانی ڕایگەیاند، لە دیداری نێوان سەرۆک بارزانی و دانیال ڕۆبنستین، ڕۆشنایی خرایە سەر دەرئەنجامەكانی سەردانی شاندی ئیمرالی بۆ هەرێمی كوردستان و هەروەها دیداری نێوان سەرۆك بارزانی و مەزلووم عەبدی.

تەوەرێکی دیکەی کۆبوونەوەکە، پەیوەندییەكانی نێوان حكومەتی هەرێمی كوردستان و حكومەتی عێراقی فیدڕاڵ بوون.

زانیاریی زیاتر: سەبارەت بە ڕەفتارەکانی ئەم دواییەی سوپای عێراق بەرامبەر جووتیارانی کورد لە کەرکووک، سەرۆك بارزانی وێڕای ئاماژەدان بە ڕەفتاری نابەجێ و ئازاردانی جووتیارانی كورد، ڕایگەیاند، ئەم ڕەفتارانە دەرخەری عەقڵیەتی شۆڤێنین و دیمەنەكانی جینۆسایدی گەلەكەمان دێنێتەوە یادمان.

سەرۆك بارزانی دووپاتیكردەوە كە پێویستە لە عێراقدا لە چوارچێوەی دەستوور كار بە پڕەنسیپەكانی شەراكەت و تەوازون و تەوافوق بكرێت.