ئیتاڵیا لەڕێگەی مەشق و ڕاهێنانی سەربازی توانای هێزەكانی پێشمەرگە بەرزدەكاتەوە

ئاڤا نیوز

خولێكی مەشق و ڕاهێنانی سەربازی بۆ هێزەكانی پێشمەرگە بەكۆتا هات كە لەلایەن هێزەكانی ئیتاڵیاوە سەرپەرشتی دەكرا.

وێنە گەورەكە: ئەمڕۆ 20-2-2025، بە ئامادەبوونی فەرماندەی بنكەی مەشقی پیادەی سلێمانی و فەرماندەی هێزەكانی ئیتاڵیا لە هەرێمی كوردستان، خولێكی ئاستی نێودەوڵەتیی مەشق و ڕاهێنانی سەربازی بەكۆتا هات، كە بۆ ماوەی چوار هەفتە بەردەوام بوو، تێیدا ژمارەیەك پێشمەرگەی لیوا و یەكە جیاوازەكانی سەر بە فیرقەی چواری پیادەی وەزارەتی پێشمەرگە، بەنوێترین مەشق و پلانە سەربازییەكان ئاشنا كران.

ڕاگەیێنراوی فەرمی: بەپێی ڕاگەیێنراوی وەزارەتی كاروباری پێشمەرگە، هەریەك لە عەقید شاهین، فەرماندەی بنکەی مەشقی پیادەی سلێمانی و کۆڵۆنێڵ ئەنتۆنیلۆ ئاندریۆتۆلا، فەرماندەی هێزەکانی ئیتاڵیا لە هەرێمی کوردستان، لە مەڕاسیمی كۆتاییهاتنی خولی مەشق و ڕاهێنانی سەربازی ئامادەبوون كە وانەكانی خولەكە لەلایەن تیمی شارەزایانی مەشق و ڕاهێنانی هێزەكانی ئیتاڵیا بەشێوەی تیۆری و پڕاكتیكی دەوترانەوە.

ئەوەی پێویستە بیزانیت: كردنەوەی خولی مەشق و ڕاهێنانی سەربازی بۆ هێزەكانی پێشمەرگە لەسەرجەم فیرقە و ناوچە و لیواكان، لە چوارچێوەی پلانی مەشقی هێزەکانی هاوپەیمانانە بۆ هێزەکانی پێشمەرگە كە بەشداربووانی ئەمجۆرە خولانە دەبنە خاوەنی بڕوانامەی ئەكادیمیی ئاستی بەرز لە توانای سەربازیدا.