ئاسایشی سلێمانی: لەسەر گرژی و ئاڵۆزییەکانی عەربەت هیچ کەسێک دەستگیر نەکراوە

ئاڤا نیوز

 

دەزگای ئاسایشی سلێمانی ڕوونکردنەوە لەسەر گرژی و ئاڵۆزییەکانی شەوی ڕابردووی شارۆچکەی عەربەت دەدات، سەبارەت بە دەستگیکردنی هاووڵاتیان جەخت دەکاتەوە، کە هیچ کەسێک دەستگیر نەکراوە.

 

چیرۆکی سەرەکی: شەوی ڕابردوو 20-02-2025 لە نزیک شارۆچکەی عەربەت بەهۆی ڕێگری کردن لە تێپەڕبوونی ژمارەیەک بارهەڵگر لەلایەن مامۆستایان و هاووڵاتیان، گرژی و ئاڵۆزی لەنێوانیاندا دروستبوو، بەهۆیەوە ژمارەیەک هاووڵاتی بریندار بوون، هاوکات دەنگۆی ئەوە بڵاوبوویەوە کە بەشێکیان دەستگیرکراون، بەڵام دەزگای ئاسایش ڕەتیدەکاتەوە.

 

ڕاگەیێنراوی فەرمی: دەزگای ئاسایشی هەرێم – سلێمانی لە ڕاگەیێنراوێکدا ئاماژەی بەوەداوە: -

ــ وەک لایەنی جێبەجێکاری یاسا دەستبەجێ بەمەبەستی کۆنتڕۆڵکردنی ئەو بارودۆخە نەخوازراوە و ڕێگریکردن لە تەشەنەکردنی ئاڵۆزییەکان و سەلامەتی گیانی هەموو لایەک گەیشتنە شوێنی ڕووداوەکە و ڕێکاری یاسایی گرتەبەر بۆ هێورکردنەوەی بارودۆخەکە.

ـــ هيچ كەس لەسەر ئەو گرژیانە دەستگير نەكراوه و هاووڵاتییە بريندارەكان لە نەخۆشخانه نەماون.