نرخی دۆلار و زێڕ بەرزبوونەوە

 

ئاڤا نیوز

لەگەڵ ئەوەی نرخی دۆلار لە دوێنێوە ئاڕاستەی دابەزینی وەرگرتووە و بەهای 100 دۆلار تاوەکو ئاستی 146 هەزار دینار دابەزی، بەڵام لەدوای نیوەڕۆی ئەمڕۆوە بەهای دینار جارێکی دیکە دابەزی و بەهای 100 دۆلار گەیشتەوە 148 هەزار دینار. 

هۆکارە زانراوەکان: هۆکاری سەرەکی ئەو بەرزبوونەوەیە بۆ ئەوە دەگەڕێتەوە، کە بەهای دۆلار گەیشتە نزمترین ئاستی خۆی هیچ هۆکارێک نەبوو زیاتر دایبەزێنێت، بۆیە گەڕایەوە شوێنی سروشتی خۆی و جارێکی دیکە بەرزبووەوە بۆ ئاستی 148 هەزار دینار.

لە لایەکی دیکەوە: نرخی زێڕ، دوای ئەوەی لە کۆتایی هەفتەی رابردوو دابەزینی بەرچاوی تۆمارکرد، ئەویش بەهەمان شێوە لە مامەڵەکانی دوای نیوەڕۆوە بەرزبووەوە نرخی ئۆنسێکی گەیشتە 2855 دۆلار.

زانیاریی زیاتر: لە بازاڕەکانی هەرێمی کوردستان، بە کاریگەری دابەزینی بەهای دۆلار و نرخی زێڕ لە بازاڕەکانی جیهان. نرخی زێڕ بە شێوەیەکی بەرچاو دابەزیوە، بەجۆرێک نرخی مسقاڵێکی زێڕی عەیار 21 لە 623 هەزار دینارەوە بۆ 600 هەزار دینار دابەزیوە. واتە بەراورد بە هەفتەی ڕابردوو نرخی هەر مسقاڵێک بە نزیکەیی 25 هەزار دینار دابەزیوە.