ئەمساڵ لە عێراق دامەزراندن ڕادەگیرێت

ئاڤا نیوز

لیژنەی دارایی پەرلەمانی عێراق ئاشكراي كرد، لەپێناو کەمکردنەوەی خەرجییەکانی حکومەت لە خشتەکانی بودجەی ئەمساڵدا دامەزراندنی نوێ ناکرێت. 

وێنە گەورەکە: پێشبینی دەکرێت خشتەکانی بودجە لە ناوەڕاستی ئەم مانگە بگاتە پەرلەمان و پەسەند بکرێت، بەمەش کۆتایی دێت بە بابەتی بودجە، چونکە تەمەنی حکومەتەکەی سوودانی ئەمساڵ کۆتایی دێت.

لێدوانی فەرمی: عەتوان عەتوانی، سەرۆکی لیژنەی دارایی پەرلەمانی عێراق ڕایگەیاند:

- حکومەت هەندێک گۆڕانکاری لە خشتەی بودجەدا دەکات، بەڵام خەرجی بودجەی ئەمساڵی عێراق لە بودجەی ساڵی ڕابردوو زیاتر نابێت.

- لە خشتەکانی بودجەی ئەمساڵدا دامەزراندن و گرێبەستی نوێ ڕاگیراوە و تەنیا  گرێبەستی ئەو فەرمانبەرانەی پێشووتر نوێ دەکرێتەوە.

کاریگەری و لێکەوتەکان: بەهۆی دەرهێنانی دامەزراندن لە خشتەی بودجەی ئەمساڵ، بڕیاری دامەزراندنی هەزاران دەرچووی زانکۆکان (بەکالۆریۆس، ماستەر و دکتۆرا) لەگەڵ دەرچووانی کۆلێژە پزیشکییەکان بەشێوەیەکی کاتی ڕادەگیرێت.