نرخی سەوزە و میوە لە هەولێر بۆ دوو هێندە بەرزدەبێتەوە

ئاڤا نیوز

نرخی سەوزە و میوە لە هەولێر گران بووە و هەندێک جۆریان نرخیان دوو هێندە بەرزبووەتەوە. هۆبەی چاودێری گومرگی کشتوکاڵی هەولێریش ڕوونکردنەوە لەسەر هۆکارەکەی دەدات.

لێدوانی فەرمی: میوە فرۆشێک کە نەیویست ناوی ئاشکرا بکرێت، بۆ ئاڤا میدیا وتی،

- لەگەڵ هاتنی مانگی ڕەمەزان هەموو شتێک لە بازاڕی سەوزە و میوەی هەولێر گران بووە.

- ئەگەر کولەکە بە نمونە وەربگرین، یەک ڕۆژ پێش مانگی ڕەمەزان کیلۆی بە 400 دینار بوو، بەڵام ئێستا کیلۆی بە هەزار و 250 دینارە. هاوکات بابەتەکانی دیکەش بە هەمان شێوە نرخەکەی زۆر گران بووە.

لەلایەکی دیکەوە: وشیار جەلیل، بەرپرسی هۆبەی چاودێری گومرگی کشتوکاڵی هەولێر بۆ ئاڤا میدیا دەڵێت: ئاستەنگی هاتووچۆی دەرەکی یەکێک لە هۆکارەکانەم، چونکە زۆربەی ئەو بابەتانە لە ئێران و تورکیاوە هاوردەی هەرێمی کوردستان دەکرێت. چەند ڕۆژێکە سەرما و سۆڵە هاتووچۆی بازرگانی کەم کردووەتەوە.

- ڕۆژانی شەممە نرخ دیاری دەکرێت، ڕەنگە تا شەممە نرخەکان هەرزان ببنەوە.

بە تەنیشت ئەم بابەتەوە: نەبەز عەبدولحەمید، قایمیقامی هەولێری بۆ ئاڤا وتی، بەدواداچوون دەکەن ئەگەر بزانن ئیستیغلالکردن هەیە و بازرگانان لە خۆیانەوە نرخیان بەرزکردبێتەوە، ڕێککاری یاسایی و کارگێڕییان بەرامبەر دەگرنەبەر.