موقتەدا سەدر: هەڵبژاردنی "گەندەڵکاران" هەژاری و ماڵوێرانی لێدەکەوێتەوە

ئاڤا نیوز

 

موقتەدا سەدر، ڕێبەری ڕەوتی نیشتمانیی شیعە پێیوایە هەڵبژاردنی "گەندەڵکاران" هەژاری و ماڵوێرانی لێدەکەوێتەوە، داواش دەکات خەڵکانی داوێن پاک هەڵبژێردرێن.

 

وێنە گەورەکە: بڕیارە مانگی 10ـی ئەمساڵ هەڵبژاردنی پەرلەمانی عێراق بکرێت، چاوەڕوان دەکرێت ڕکابەرییەکی تووند لەنێوان لایەنە سیاسییەکان هەبێت و گۆڕانکاریش لە نەخشەی سیاسیی ئێستای عێراق ڕووبدات.

 
چیرۆکی سەرەکی: موقتەدا سەدر رێبەری ڕەوتی نیشتمانیی شیعە لەمیانی پێشکەشکردنی وتاری هەینی لە پارێزگای نەجەف ڕایگەیاند: "هەڵبژاردنی کەسێکی نا شایستە و گەندەڵ، بەرەو هەژاری و ماڵوێرانی دەتبات، بەپێچەوانەشەوە هەڵبژاردنی کەسێکی بەتوانا و داوێن پاک، داهاتوویەکی پڕ خێر و بەرەکەتت بۆ دەهێنێت".

 

زانیاریی زیاتر: لە کۆتایی وتارەکەی، سەدر بە ئامادەبووانی گوت، "لە خەڵکی ئیماندار و خواپەرست بن و مەچنە ڕیزی سەرپێچیکاران ".

 

ئەوەی پێویستە بیزانیت: ڕەوتی نیشتمانیی شیعە -پێشتر ڕەوتی سەدر بوو- لە هەڵبژاردنی پەرلەمانی عێراق لە ساڵی 2021 بەشداریی کرد و زۆرترین کورسی لەسەرتاسەری عێراق بەدەستهێنا(73 کورسی)، دواتر بەهۆی ناکۆکییەکانی لەگەڵ لایەنەکانی دیکەی شیعە لەسەر پێکهێنانی حکومەت، ساڵی 2022 لە پەرلەمان و پرۆسەی سیاسی کشایەوە.