پەیڕەوانی شیعە مەزهەب لەبەسرە شەقامێک دادەخەن و شین دەگێڕن

ئاڤا نیوز

بەبۆنەی ساڵیادی برینداربوون و شەهیدبوونی ئیمامی عەلی، بەشێک لەهاووڵاتییانی شیعە مەزهەب لەبەسرە شەقامێکی سەرەکی دادەخەن تاوەکو شین بگێڕن، هێزە ئەمنییەکانی ئەو پارێزگایەش ڕێگرییان لێدەکەن.

چیرۆکی سەرەکی: عەلی کوڕی ئەبو تالیب، چوارەم خەلیفەی ئيسلام، لە 21 ـی ڕەمەزانی ساڵی 40 ـی کۆچی بەدەستی عەبدولڕەحمانی کوڕی مولجەمەوە لە مزگەوتی گەورەی کوفە لە کاتی نوێژی بەیانی شەهیدکرا.

زانیاریی پەیامنێر: دەروون مەلا ناجی، پەیامنێری ئاڤا میدیا لەشاری بەسرەوە ڕایگەیاند:  بەبۆنەی ساڵیادی برینداربوون و شەهیدبوونی ئیمامی عەلی پەیڕەوانی شیعە مەزهەب لەبەسرە شەقامی سەرەکی کۆڕنیشیان داخستووە و خێوەتیان هەڵداوە تاوەکو شین بگێڕن.

زانیاریی زیاتر: لیژنەی ئەمنی پارێزگای بەسرە ڕێکاری ئەمنی گرتووەتەبەر و ڕێگا بە ئاهەنگگێڕان نادات.

ئەمەش بزانە:  بڕیارە کاتژمێر 9:15ـی ئێوارەی ئەمڕۆ پێنجشەممە 20-03-2025، یاریی نێوان عێراق و کوێت لە چوارچێوەی گەڕی حەوتەمی کۆمەڵەی Bی پاڵاوتنەکانی کیشوەری ئاسیا بۆ گەیشتن بە جامی جیهانی 2026 لە بەسرە بەڕێوەبچێت، ئەمەش لەکاتێکدا بەشێک لە پیاوانیی ئایینی شیعە و وتاربێژانی مزگەوتەکان داوایان کردووە کاتی ئەم یارییە دوابخرێت، چونکە هاوکاتە لەگەڵ یادی برینداربوونی ئیمام عەلی.