بەسڕە بەهەشتی کاسبکارە ئێرانییەکان و جەهەننەمی عێراقییەکان

ئاڤا نیوز

 

کاسبکارە ئێرانییەکان رۆژانی هەینی لە سنوری بەسڕەوە دێنە عێراق و بەرهەمەکانیان ساغ دەکەنەوە. داهاتی رۆژانەیان لەنێوان 30$ بۆ 50$ دۆلارە!

 

چیرۆکی سەرەکی: خراپی دۆخ و سەختی گوزەرانی هاوڵاتییانی ئێران وایکردووە بەشێک لەو کاسبکارە ئێرانییانەی لە وڵاتەکەیان توانای ساغکردنەوەی بەرهەمەکانیان نییە، رۆژانی هەینی لەڕێگەی مەرزی شەلەمچەوە بێنە بەسڕە و لە بازاڕەکانی ئەوێ بەرهەمەکانیان ساغ بکەنەوە.
 
پێدراوە ڕاستەکان: یەکێک لەو کاسبکارە ئێرانییانە بە ئاژانسی فرانس پرێسی ڕاگەیاند: کە سزاکانی رۆژئاوا بۆ سەر ئێران وایکردووە بارودۆخەکە زۆر سەخت و دژواربێت. دەشڵێت لەوێ کڕیارمان نییە، بەرهەمەکانمان خراپ دەبن، بۆیە ناچارین فڕێیان بدەین و زیانی زۆرمان پێدەگات. بۆیە ئەمە حەوت ساڵە بەردەوام دێمە عێراق و لە هاویندا بامیە و لە زستاندا خورما دەفرۆشم. قازانجەکەشم 30$ بۆ 50$ دۆلار دەبێت لە رۆژێکدا. ئەم پارەیەش زۆرە بەراورد بەو قازانجەی لە ئێران دەستمان دەکەوێت. 

 

هۆکارە زانراوەکان: هەڵاوسانی بەرز و دابەزینی بەهای تمەنی ئێرانی هۆکاری سەرەکین بۆ تێكچوونی گوزەرانی هاوڵاتیانی ئێران. 

 

زانیاریی زیاتر: ئەو بەرهەمانەی کە کاسبکارە ئێرانییەکان لە وڵاتەکانیانەوە دەیهێنن بۆ عێراق بریتین لە مریشک، هێلکە، زەیتی خۆراک و پێداویستییەکانی ماڵەوە. ئەم بەرهەمانە بەنرخێکی کەم لە بازاڕەکانی بەسڕە ساغ دەکەنەوە. ئەمە یارمەتییان دەدات قازانجێکی زۆریان دەست بکەوێت.

 

لەلایکی دیکەوە: لەگەڵ ئەوەی بەسڕە شارێکی دەوڵەمەندە بە سەرچاوە سروشتییەکان و نەوت. هەروەها هەڵکەوتەی جوگرافی شارەکە یارمەتیدەرە بۆ ئەوەی دانیشتوانی ئەو شارە لەڕووی ئابوورییەوە لە ئاستێکی باشی گوازەران و داهاتی بەرزدابن، بەڵام بەهۆی پیسی ژینگە و بێکاری بەرز و دواکەووتنی ژێرخانی شارەکە بووەتە هۆکار بۆ خراپی دۆخی ئابووری دانیشتوانی شارەکە.