یانەی دهۆک جامی کەنداو پێشکەش بە سەرۆک بارزانی دەکات

ئاڤا نیوز

سەرۆك بارزانی، پێشوازیی لە ستافی یانەی وەرزشیی دهۆك دەكات و وێڕای پیرۆزبایی بەدەستهێنانی جامی كەنداو، پاڵپشتیی خۆی بۆ یانەکە و سەرجەم وەرزشوانانی كوردستان دووپات دەكاتەوە.

چیرۆکی سەرەکی: ڕۆژی 2025-04-15، لە یاریی كۆتایی جامی كەنداو كە لە شاری دهۆك بەڕێوەچوو، یانەی دهۆك بەسەر یانەی قادسیەی كوێتی سەركەوت و جامەكەی بەدەستهێنا و پێشنیوەڕۆی ئەمڕۆ پێنجشەممە 2025-04-17، لە سەڵاحەددین سەرۆك بارزانی پێشوازی لە بەڕێوەبەر و یاریزانان و ستافی یانەی وەرزشیی دهۆك كرد.

ڕاگەیێنراوی فەرمی: بارەگای بارزانی ڕایگەیاند:

٠ لەو دیدارەدا كە د. عەلی تەتەر پارێزگاری دهۆكیش ئامادە بوو، سەرۆك بارزانی بە گەرمی بەخێرهاتنی یانەی وەرزشیی دهۆكی كرد و پیرۆزبایی سەركەوتن و بەدەستهێنانی قارەمانێتی جامی كەنداوی لێ كردن و دەستخۆشی لە یاریزانان و ستاف و بەڕێوەبەر و هەموو ئەوانە كرد كە ڕۆڵیان لەو سەركەوتنە مێژووییەدا هەبووە.

٠ سەرۆك بارزانی ئاماژەی بە ڕۆڵی وەرزش و وەرزشوانان لە ژیانی گەلان دا و ئەوەشی خستەڕوو ئێوە دەتوانن لە سیاسەت زیاتر و باشتر دۆزی گەلەكەتان بە جیهان بناسێنن.

٠ سەرۆك بارزانی پاڵپشتیی خۆی بۆ یانەی وەرزشیی دهۆك و سەرجەم وەرزشوانانی كوردستان دووپات كردەوە و هیوای سەركەوتن و بەردەوامی بۆ خواستن.

٠ هەر لەو دیدارەدا شاندی میوان سوپاسی پاڵپشتی و خەمخۆریی سەرۆك بارزانیان كرد و ڕایانگەیاند كە پاڵپشتیەكانی سەرۆك بارزانی ئیرادەی سەركەوتن و ورەی زۆری پێ بەخشیون و ئەو سەركەوتن و جامەی بە دەستیان هێناوە وەك دیاری پێشكەشی سەرۆك بارزانیی دەكەن.