پێشانگەیەکی هەلى کار لە سلێمانی دەکرێتەوە

ئاڤا نیوز

سەرەتاى مانگى داهاتوو لە شارى سلێمانى پێشانگەى هەلى کار دەکرێتەوە، تێیدا چەندین خاوەنکار هەلى کارەکانیان بۆ کارخوازان دەخەنەڕوو.

وێنە گەورەكە: بە هەماهەنگى نێوان بەڕێوەبەرایەتیی گشتیی کار و دەستەبەرى کۆمەڵایەتى، ڕێکخراوى کارى نێودەوڵەتى 'ILO' و زانکۆى پۆلیتەکنیکى سلێمانى، كاتژمێر 10:00ـی بەیانی لە ڕۆژی 4ـی ئایاری 2025، لە كارگەی كولتوور لە شەقامی سالم، دووەمین پێشانگەی هەلی كار لە هەرێمی كوردستان دەكرێتەوە و تا 05:00ی ئێوارەی هەمان ڕۆژ بەردەوام دەبێت.

زانیاریی بەدەستهاتوو: لە بەڕێوەبەرایەتیی گشتیی کار و دەستەبەری کۆمەڵایەتی بە ئاڤایان ڕاگەیاند، لەم پێشانگەیە زیاتر لە 50 خاوەنکار و هەزار قوتابیی دەرچووى زانکۆ و کارخواز بەشدار دەبن و بەشێوەیەکى ئەلیکترۆنى لە پلاتفۆڕمى هەلى کار، ئەو پێویستییانە دەخرێنەڕوو کە خاوەنکارەکان تیایدا پێویستییان بە دەستى کارە.

ئەوەی پێویستە بیزانیت: كارخوازان بۆ دەسكەوتنی زانیاریی زیاتر، دەتوانن پەیوەندیی بە ژمارەكانی هێڵی هۆشیاری كرێكاران بكەن یاخود سەردانی پلاتفۆرمى هەلى کار بکەن بۆ دروستکردنى هەژمارى تایبەت بە خۆیان.

باكگراوند: یەکەمین پێشانگەى هەلى کار لە 10ـی تشرینی دووەمی ساڵی ڕابردوو، لە شارى هەولێر بەڕێوەچوو، تیایدا "پلاتفۆرمى هەلى کار"، کارا کرا و لەوکاتەوە کارخوازان و خاوەنکارەکان هەژمارى تایبەت بە خۆیان لە پلاتفۆڕمەکەدا دروست دەکەن بۆ دۆزینەوەى هەلى کار بۆ بێکاران و گەیشتن بە دەستى کار بۆ خاوەنکارەکان.