لە هەولێر گەورەترین پێشانگای گەشتیاری لەسەر ئاستی ڕۆژهەڵاتی ناوەڕاست دەكرێتەوە

 

ئاڤا نیوز

لە ناوەڕاستی ئەم هەفتەیە، گەورەترین پێشانگەی گەشتوگوزار لە هەولێر دەكرێتەوە و جگە لە دامەزراوە و كۆمپانیا ناوخۆییەكان، دەیان كۆمپانیای نێودەوڵەتیی و بیانی تێیدا بەشدار دەبن.

چیرۆكی سەرەكی: وەزیری شارەوانی و گەشتوگوزاری حكومەتی هەرێمی كوردستان، بەمەبەستی لەنزیكەوە ئاگاداربوون لە ئامادەكارییەكانی گەورەترین پێشانگای گەشتوگوزار 'مێتێكس-2025'، سەردانی پێشانگەی نێودەوڵەتیی هەولێری كرد كە بڕیارە ڕۆژی سێشەممە 6ـی ئایار دەستپێبكات و ماوەی سێ ڕۆژ بەردەوام بێت.

لێدوانی فەرمی: ساسان عەونی، وەزیری شارەوانی و گەشتوگوزاری هەرێمی كوردستان ڕایگەیاند، هاوشانی پرۆژە و كۆمپانیا گەورە گەشتیارییەكان، هەردوو بەڕێوەبەرایەتیی گشتیی گەشتوگوزاری هەولێر و سلێمانی و سەرۆكایەتیی شارەوانیی هەولێر، جوانترین و نوێترین دیزاینیان لە پێگەكانیان لەم پێشانگایە، بەكارهێناوە.

بۆچی گرنگە: لەچوارچێوەی پلانی تۆكمە و درێژخایەنی كابینەی نۆیەمی حكومەتی هەرێمی كوردستان بۆ پەرەپێدانی سێكتەری گەشتیاری، بەمەبەستی ڕاكێشانی زۆرترین گەشتیاری ناوخۆیی و بیانی بۆ هەرێمی كوردستان و پشتبەستن بەم كەرتە وەك سەرچاوەیەكی گرنگی داهات، بەڕێوەچوونی پێشانگەی نێودەوڵەتیی گەشتوگوزار لە هەولێری پایتەخت و بەشداریكردنی ژمارەیەكی زۆری كۆمپانیا جیهانییەكانی كەرتی گەشتیاری، ڕۆڵی كاریگەری دەبێت لە زیاتر ناساندنی ڕووی پێشكەوتنی گەشتیاریی هەرێمی كوردستان.