شەرقولئەوسەت: بەغدا هەڵوێستی خۆی لەبارەی گرێبەستەکانی هەرێمی کوردستان نەرم دەکات

ئاڤا نیوز

 

ڕۆژنامەی شەرقولئەوسەت بڵاوی کردووەتەوە، حکومەتی عێراق لەبارەی گرێبەستە نەوتییەکانی هەرێمی کوردستان لەگەڵ کۆمپانیا ئەمریکییەکان گۆڕانکاریی لە هەڵوێستەکانی کردووە و نەرمی ناوەندووە، ئێستا تەنیا داوای پابەندبوون بە دەستوورەوە دەکات. 

 

وێنە گەورەکە: سەرۆکوەزیران مەسرور بارزانی، بە یاوەری شاندێک باڵا لە حكومەتی هەرێمی كوردستان چەند ڕۆژێكە بە سەردانێكی فەرمی لە ئەمریكایە، جگە لە چەندین دیداری گرنگ لەگەڵ بەرپرسانی وڵاتەكە، ڕۆژی دووشەممەی ڕابردوو سەرپەرشتی واژۆکردنی دوو ڕێککەوتننامەی گرنگی کرد لەگەڵ دوو گەورە کۆمپانیای ئەمریکی کە (وێسترن زاگرۆس و ئێچ کەی ئێن)، کە کاردەکەن بۆ پەرەپێدانی کەرتی وزەی کوردستان.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق بڵاوی کردەوە: لە میانی پێشوازیکردنی لە هەردوو سیناتۆری ئەمریکی ئەنگوس کینگ و جەیمس لانکفۆرد لەبەغدای پایتەخت، محەممەد شیاع سوودانی، سەرۆکوەزیرانی عێراق خواستی خۆی بۆ پتەوکردنی پەیوەندییەکانی لەگەڵ ئەمەریکا لە سەرجەم سیکتەرەکاندا نیشانداوە، بەتایبەتی لە کەرتەکانی ئابووری، وزە، وەبەرهێنان و ڕۆشنبیری.

 

زانیاریی زیاتر: سوودانی ئاماژەی بەوەشکرد، حکومەت هەنگاوی یەکلاکەرەوەی لە کەرتی نەوت و گازدا ناوە و دەستکەوتی بەرچاوی لەگەڵ کۆمپانیاکانی ئەمریکا بەدەستهێناوە.

 

لەلایەکی دیکەوە:  لە بەیاننامەیەکدا وەزارەتی نەوتی عێراق ڕایگەیاند، وەزارەتی نەوت هیچ لاریەک و ڕەخنەیەکی سەبارەت بە مامەڵەکردنی حکومەتی هەرێمی کوردستان لەگەڵ کۆمپانیا ئەمریکییەکان نییە لە چوارچێوەی دەستووردا.