فایلی خەڵک؛ دانیشتووانی گوندێکی هەڵەبجە بەدەست مینی چێندراوەوە بێزار بوون

ئاڤا نیوز

دانیشتووانی گوندی بەلەسۆینی سەر بە ناحیەی بەمۆ لە سنووری پارێزگای هەڵەبجە لە دەست هەبوونی مینی چێنراو بێزار بوونە، داوا لە ئاڤا دەکەن کێشەکەیان بەلایەنی پەیوەندیدار بگەیێنن.

وێنە گەورەکە: گوندی بەلەسۆین لە سنووری پارێزگای هەڵەبجە نزیکەی 14 ماڵی تێدا نیشتەجێیە و زۆربەی ئاژەڵدارن، دانیشتووانەکەی دەڵێن: گوندەکەمان ژمارەیەکی زۆر مینی سەردەمی بەعسی تێدایە، بەهۆی تەقینەوەی ئەو مینانە ژمارەیەکی زۆر هاووڵاتی لە گوندەکە برینداربوون  و گیانیان لەدەستداوە.

ئەوەی پێویستە بیزانیت: تائێستا 22 کەس بەهۆی مینەوە لەو گوندە گیانیان لەدەستداوە، ژمارەیەک هاووڵاتیش کەم ئەندام بوون و بەهۆی تەقینەوەی مینەوە قاچ و دەستیان لەدەست داوە.

دانیشتووانی گوندەکە باس لەوە دەکەن، ساڵانه بەهۆی تەقینەوەی مینەوە له وەرگای گوندەکە دەسوتێت و ئاژەڵەکان بێ لەوەر دەمێننەوە. هاوکات کانیاوەکان لە مانگی حەوتەوە تا مانگی دوو وشک دەکات و گوندەکە بێ ئاو دەمێنێتەوە.

لێدوانی فەرمی: عەلی میران، بەڕێوەبەری گشتیی تەکنیکی لە دەزگای مین دەڵێ: لەبەیانی زووتر نییە تیم بۆ گوندەکە دەنێرین، ڕووپێوی بۆ شوێنەکە دەکەین و دواتر هەڵیان دەگرینەوە و کێشەکەیان چارەسەر دەکەین.

- ئەو شوێنانەی ئەڵغامەکانی تێدایە، تەلبەندی دەکەن بۆ ئەوەی کەس نەچێتە ناوی، دواتر هۆشیاری لەناو خەڵکەکەدا بڵاو دەکەینەوە.