نرخی زێڕ بەردەوامە لە بەرزبوونەوە

ئاڤا نیوز

 

ماوەی سێ ڕۆژە بەهۆی گرژییەکانی نێوان ئیسرائیل و ئێران، بەهای دۆلاری ئەمریکی بەرامبەر دیناری عێراقی زیاتر بەرزبووەتەوە و کاریگەرییەکانی ئەو شەڕە نرخی زێڕیشی زیاتر بەرزکردووەتەوە. 

 

چیرۆکی سەرەکی: لە ڕۆژی هەینییەوە جەنگی نێوان ئیسرائیل و ئێران دەستیپكردووە ، ئەمەش کاریگەریی بەرچاوی کردووەتە سەر بەرزبوونەوەی نرخی زێڕ لە بازاڕەکانی جیهاندا، نرخی ئۆنسەیەک زێر لە بازاڕەکانی جیهاندا گەیشتە سێ هەزار و 425 دۆلار، هاوکات لە بازاڕەکانی هەرێمی کوردستانیش بە سێ هەزار و 432 دۆلار مامەڵەی پێوەدەکرێت، بەراورد بە دوو ڕۆژ پێش ئێستاش نرخی ئۆنسەیەک زێر زیاتر لە 50 دۆلار بەرزبووەتەوە.

لێدوانی فەرمی: هەندرێن وەرتی، سەرۆکی سەندیکای زێڕەنگەرانی هەولێر بە ئاڤای گوت: لە دوێنێوە نرخی یەک مسقاڵ زێڕی عەیار 21 گەیشتووەتە 695 هەزار دینار، ئەمشەویش بۆرسەی جیهانی زێر دەکرێتەوە و پێشبینی دەکرێت گۆڕانکاری زیاتر لە نرخی زێر ڕووبدات.

زانیاریی زیاتر: ئەمڕۆ یەکشەممە نرخی زێر لە بازاڕەکانی هەرێمی کوردستان بەم شێوەیە مامەڵەی پێوەدەکرێت بەگوێرەی دانانی نرخەکەی لەلایەن سەندیکای زێرەنگەرانەوە:- 

یەک مسقاڵ زێڕی عەیار 22: 728 هەزار دینار.
یەک مسقاڵ زێڕی عەیار 21: 695 هەزار دینار.
یەک مسقاڵ زێڕی عەیار 18: 595 هەزار دینار.